Concert tour neih tawh zingah U2 an hlawhtling ber

Music khawvelah concert tour an neih ṭanna a rei tawh a, khawvel huapa lar leh hlawhtling tam takin tour ropui tak tak an nei tawh a, chung zingah chuan U2 concert tour 360º chu sum lalut hnem ber a la ni.

Tunhnai chho maiah pawh khawvela zaithiam hlawhtling ber berten concert tour an nei chungin, kum 2009-2011 chhunga U2-in U2 360º tour an neih kha sum lakluh hnem lamah tu concert tour mahin a la phak lo. He tour-ah hian U2 hian North America, Oceania, South America, Africa leh Europe an tlawh a, tour aṭanga sum an hmuh zawng zawng hi USD mtd 784,027,536 zet a ni. He concert-ah hian show vawi 110 an nei a, entu zawng zawng hi mi maktaduai 7 an tling a, concert vawi khat zelah entu 66,110 awm ang an ni.

Tour hlawhtling ber dawttu chu hmana band hlawhtling, 2000s chhoah pawh la hlawhtling em em, The Rolling Stones an ni. The Rolling Stones concert tour pathum chu concert tour hlawhtling 10-ah a lang. Tuna pahnihna ni pha an concert tour hi A Bigger Bang Tour a ni a, kum 2005-07 chhunga an neih kha a ni a, sum an hmuh zawng zawng chu USD mtd 644,802,601 a ni a, concert ṭum khatah entu 32,500 awm zel ang an ni a, show 144 an nei. Kum 1994-95-a Voodoo Lounge Tour-ah khan The Rolling Stones hian USD mtd 462 an lalut a, tour hlawhtling pakuanaah a lang a, kum 2002-2003-a Licks Tour an neihah khan USD mtd 404 an lalut a, 10-naah a lang.

Roger Waters-a’n The Wall Live tour a neih kha sum lalut hnem pathumna a ni a, USD mtd 471.58 a lalut. He tour-ah hian show vawi 219 a awm a, kum 2010-13 chhung khan a ni. A concert ṭum khatah entu mi 18,858 awm ziah ang an ni. AC/DC-in kum 2008-2010 chhunga Black Ice World Tour an neihah khan USD mtd 484.47 an lalut a, Madonna tour, Sticky & Sweet tour khan USD mtd 455.46 a lalut.

Tour hlawhtling dang, 10-a lang pha zingah USD mtd 402 an lakna, The Police-in The Police Reunion tour an neih te, Bruce Springteen-a’n kum 2012-13 chhunga Wrecking Ball World Tour an neih USD mtd 396 an lakluhna te kha a lang.