Star Wars hi movie a ni satliah lo!

Movie hmuhnawm leh ropui takah Star Wars hi i lo ngai a nih chuan he film siamtuten movie a ni satliah ringawt lo an ti. Star Wars movie ho hi khawvela movie hlawhtling ber ber an ni a, tunlai ṭhalai tam tak nunah nghawng a nei.

JJ Abrams chuan Star Wars movie chungchang sawiin, “Star Wars hi movie a ni satliah lo a, sakhua a ni,” a ti a, an fan tam tak chuan movie-ah an ngai lo a, sakhaw thil angah an ngai niin a sawi. Star Wars movie aṭang hian Jediism movement a chhuak a, BBC chuan kum 2015 khan Jediism hi new religious movement tiin article meuhin an tichhuak tawh.

Kum 2001-a UK chhiarpuiah khan mi tam tak chuan an sakhuaah Jediism tih an lo dah tawh a ni. UK-ah hian Scientologist aiin Jediist hi an tam zawk nia ngaih a ni. UK-ah chauh ni loin khawvel hmun hrang hrangah Jediism hian nghawng a nei lian sawt hle. Turkey-a Dokuz Eylül University-ah Muslim hoin an campus chhunga mosque sak a nih theih nan petition an siam a, hemi thik hian he university-a Jediist te chuan Jediism temple din a nih theih nan petition an siam ve leh bawk a, signature an la khawm a, Muslim leh Jedi temple sak a nih theih nana petition an siamah hian hming nuai hnih ziah tlin a ngai a, an tlin lo ve ve.

Star Wars film thar kumin December-a tihchhuah a nih tur hian huhang a nei lian sawt hle. December 15 khian Star Wars: The Last Jedi chu US-ah chhuah ṭan a ni dawn a, Mark Hamill a lang leh ang a, Daisy Ridley, John Boyega, Adam Driver, Lupita Nyong’o, Oscar Isaac, Domhnall Gleeson, Anthony Daniels, Gwendoline Christie and Andy Serkis, Benicio Del Toro, Laura Dern leh Kelly Marie Tran te pawh an chang leh dawn.