SEKI Season 2 Kan sawi leh dawn; ROCK music a nung! Inelna zawhfel a ni ta a, zanin leh naktuk zanah result puan a ni ang
SEKI Inter Village Band Contest 2022 chu a hmawr bawk a ni dawn ta
Thawhlehni zanah khan Vanapa Hall leh a chhehvelah i kal a nih chuan lirthei a maka maka tam ding i hmu ang. Rock music ngaithla tura Vanapa Hall pan khawmtute lirthei dah a nih kha! Kum hnih tal tawp hripui leng vangin show lian tham a buatsaih theih loha, rock music fan-te thlunbehin an awm a ni ber. Active Sound chuan SEKI hmangin thlunbeh an nihna hrui chu a rawn phelhsak a, rock fan-te Vanapa Hall-ah an sapatal a ni ber mai.
Under 19, an music a naupang lo
Thawhlehni zanah khan U-19 category-a tel band pangate chu a tawpna atan an inel leh. Ramhlun South LC, Chaltlang LC, Ramthar Veng LC, Dinthar LC leh Chhinga Veng LC-te chu inel lehin U-19 inelna mah nise an rimawi play chhuah a puitling hlawm. An kum naupang mah se an music erawh a naupang chhia hauh lo. An inbuatsaihna a ṭha a, hla pakhat ṭheuh hmangin an inel a, an chepui tlang vek a, an hmuhnawm bawk.
Music ṭang ṭha tak leh solid ṭha tak kalkhawmte an hlui hlawm a, endiktute tan pawh a ṭha ber thlan thiam har tak tur a ni. Mizo naupangte'n rimawia hma an sawnzia a hmuh theih.
Open Category top 5 ho mawlh mai kha, an thiam
Band ṭha tak tak 25 inlan aṭanga a ṭha zual panga inelna an ni tawh. Boruak a ṭang a, veng/khaw tinin thlawptu an nei ṭha. Hla pahnih ṭheuh hmanin anni hi an intihsiak a ni.
Serkawn VC, Lunglei chuan Open Category top 5 competition an rawn pet hawng a, thawm a ṭha nghal kher mai. An band combination ṭha tak, round danga an lo lantir fo tawh chu an lantir nawn leh. Han fak tur bik awm lo khawpin an band combination a ṭha. An guitarist slide mawi tak mawlh mai kha guitarist-te sawizui tur a ni ngei ang. Serkawn band-te hian 'Chhim thli an rawn tlehtir a, Aizawl lam an rawn thartem' fuh hle. Band dang zawngin metal lamhawi an play laiin anni hi a genre a hrang hlak a, an style hi an champion pui thei dawn em tih chu Zirtawpni zanah a hriat ang.
Chanmari West LC band pakhat zawk Polysphere an rawn inlan ve leh a, anni hian stage an rawn luah hneh rem rem hle. Mipui an ṭhap ṭha a, mipui an thunun a ni ber. An chevel a hmuhnawm a, an music ṭang ṭha tak thlawp turin 'West Warrior'-te'n an thlawp ṭha bawk. Polysphere perform lai hian Vanapa Hall-a kalkhawmte chu an 'headbang' suau suau a ni ber mai.
Electric Veng LC an rawn lang e
Electric Veng LC band-te hian danglam bikna an nei. Eng danglamna maw? Top 5 band zinga vocalist hmeichhia nei awmchhun an ni. Round danga an band perform hmu lote chuan, 'Metal band-a hmeichhia han zai tehtlat chu, a inhmeh lo mange,' an lo ti rilru mai thei. Mahse, an perform an thlir hnu chuan chiang takin an rilru an thlak ngei ang. An band combination a ṭha hle a, an rimawi play chhuah pawh a 'solid' hle. Khatiang taka Mizo hmeichhe zinga rock vocalist ṭha an lo awm kha ziahlan hmaih chi a ni lo ang. A hmuna chhimtu pakhat chuan,"A zai ka ngaithlak khan video-a lak ka theihnghilh ṭhak e," a ti a, chu chuan a sawifiah awm e.
Electric Veng aṭangin Ramthar Veng lamah Vanapa Hall-a kalte chu an tlan thla leh. Ramthar Veng LC band hi Mizo guitarist ṭha ber zinga mi Ztpa hoin an rawn feh chhuak, beisei a sang. Kalkhawmte beisei pawh an phuhru chiang hle. Ztpa'n 'class' tak maiin bul a rawn ṭan a, chumi hnuah stage sir aṭangin 'man' tak maiin an vocalist a rawn chhuak! Mipui thawm a ṭhat tawh sa tehreng nen 'Bengchheng ru!' a rawn tingat phei chu, Vanapa Hall-a pungkhawmte an sapatal a ni ber. Ztpa telpui band an nia, an music a 'solid' ṭha ang tih chu show en lo tan pawh a rinthiam theih ang. Ramthar Veng LC zai ngaithlatute chuan 'Phil Anselmo' pawh an ngai bik lo tih a chiang.
A tawp khartu Chanmari West LC
Chanmari West LC band pakhat zawk an rawn chhuak. Band inlan tawp ber an ni tawh bawk nen mipui an insum zo tawh lo. Vanapa Hall lamtualah 'Luruh Street' ho an rawn fuan thla a, tualzawlah a rualin an 'headbang' a ni ber. An music a ṭang ṭha a, metal music diktak mipui an hlui. Fans an nei ṭha bawk a, tawp khartu tur band diktakin a tawp an khar ti ila kan sawi sual lo ang.