Carlos Santana stage-ah nikhaw hre loin a tlu!

US guitar legend Carlos Santana chu Thawhlehni zanah khan Detroit, Michigan-a concert a neih laiin stage-ah nikhaw hre loin a tlu.

Kum 74 lai ni ve tawh Carlos Santana hi tualchhung damdawi-in panpui zui nghal a ni a, a manager Michael Vrionis chuan Santana chu a dinhmun a ṭhat thu a sawi tawh a ni. Santan pawhin Facebook-ah,"Tui in leh thil ei ka lo hlamchhiah deuh a, chuvang chuan ka dehydrate-a, nikhaw hre loin ka tlu ta a ni," tiin a ziak ve bawk.

A dinhmun a ṭha nia ngaih ni mah se nimina Burgettstown-a show a neih tur erawh sawn hlat a ni thung.

Santana tlu an buaipui lai video hi internet lamah chuan hmuh tur a awm nghal nual a, Clarkson Pine Knob Music Theatre-a a tlu an buaipui hnua an hruai chhuah lai chuan mipui lamah a ban a vai leh thei tawh tho a ni.

Grammy award 10 lai dawng tawhtu Carlos Santana hi Mexico-a piang niin 1960's tawp lam aṭangin khawvelin a hmelhriat tawh a, kum 1998 khan Rock and Roll Hall of Fame-ah lakluh ni tawhin kum 2015 khan Rolling Stone magazine chuan 100 greatest guitarists of all time list-a tihchhuahah 20-naah a dah.