Billboard 200 chart-a lang rei ber Dark side of the moon

US-a chart rintlak ber, Billboard chart-a album lam bik, Billboard 200 chart-ah hian Adele te ropui viauin lang mah se, he album chart, Billboard 200-a lang rei thei ber erawh pop emaw, rap emaw ni loin rock music, Pink Floyd album Dark Side of the Moon kha a ni.

Pink Floyd album ‘ Dark Side of the Moon’ hi Billboard 200 chart-a lang rei thei ber a ni a, he album hi a ropui a, khawvela music album ropui berte zinga mi a ni. He album hi Billboard 200 chart-ah chawlhkar 861 zet a lang thei a, chu chu kum 16 chhung a ni! Tunlai angah chuan album ṭha bik pawh kum khat chuang chart-a lan ngar ngar chu thil har tak a ni.

‘Dark Side of the Moon’ album hi Pink Floyd studio album pariatna a ni a, kum 1973 March 1-a an tih chhuah kha a ni. Chart-a ropuina chi hrang hrang a chan mai bakah khawvela album tihchhuah tawh zinga hralh hnem berte zinga mi a ni bawk. Kum 1973-a an tihchhuah hnuah vawi eng emaw zat tihchhuah nawn leh a ni a, tih­chhuah nawn a nih apiangin a hit em em thei reng.

Pink Floyd hian he album avang hian an hausak phah hle a, album an hralhna aṭangin Richard Wright leh Roger Waters te chuan in ṭha tak an lei nghe nghe. He album hi album tihchhuah tawh china hralh hnem ber pathumna a ni a, retailer hnena pek chhuah hralh chhuah leh aṭangin copy maktaduai 24.2 hralha ngaih a ni a, retailer kaltlang lote nen chuan copy maktaduai 45 hralha chhal a ni. US bikah copy maktaduai 15 hralha chhut a ni a, UK-ah copy mtd 4, Germany-ah copy mtd 1, France-ah copy mtd 2 leh Canada-ah copy mtd 2 hralha ngaih a ni.

Kum 1987 khan Rolling Stones chanchinbu chuan Top 100 Albums of the Last 20 Years a thlan chhuahah 35-naah a lang a, kum 2003-a 500 Greatest Albums of All Time tihchhuahah khan 43-na a ni. Dark Side of the Moon album a tira an tihchhuah kha cassette vek a la ni a, side A lamah hla 5 a awm a, side B-ah hla 5 bawk a awm.