MCR: Reunion tour aṭangin sum an lalut hnem

Europe lama reunion tour nei mek My Chemical Romance chuan $maktduai 21.1 lai sum an lalut tawh.

My Chemical Romance hian rimawi khawvela kum 20 chuang hun an hman tawh chhunga tour hrang hrang an neihnaah hetianga zata sum tam hi an la hmu chhuak ngai lo niin Billboard chuan a tarlang.

Billboard Boxscore report aṭanga a lan dan chuan May leh June thla chhung khan UK leh Europe hmun danga concert an neihnaah ticket 2,77,000 lai an hralh a, chuta ṭang chuan $mtd 21.1 hi an lalut a ni. Europeran tour an neih mek hi June 18 khan a thawh khatna chu an zo tawh a, August thla aṭang hian Oklahoma City aṭangin tour an nei leh dawn a, North America leh Oceania lam an hrut ang a, show 40 vel chu an nei leh dawn a ni. March 2023 vel thleng tour hi nei turin ruahmanna an siam. Billboard Boxscore chuan tuna an reunion tour neih mek aṭang hian $maktaduai 60 vel tal chu an lakluh an ring.

MCR hian kum 2020 khan reunion tour hi neih an tum tawh a, mahse hripui leng vangin a hun an sawn a, kumin May thla aṭang khan an nei ṭan ta chauh a ni.

Gerard Way, Ray Toro, Mikey Way leh Frank Iero-te hi hun eng emaw chen band anga an thawhho loh hnuah kum 2019 tawp lam khan reunion show an neih dawn thu hi an puangzar a, show pathum vel nei hmanin Covid-19 vangin show lian zawk neih an tum chu an kalpui thei ta lo kha a ni a, tunah erawh tour hlawhtling tak neiin hla tharte pawh an tichhuak leh tawh a ni.