SEKI Season 2 ; U-19 Band ṭha ber Dinthar LC band

Mizorama rock show lian ber Active Sound bultuma neih SEKI Inter Village Band Contest U-19 category result chu Ningani zanah khan puan a ni ta a, Dinthar LC band chu pakhatna an ni. Nizan lamah khan Open Category result puan a ni bawk a, he thu buatsaih lai hian result hriat hman a ni lo.

Ningani zanah khan SEKI Top 5 result puan thawh khatna Vanapa Hall-ah neih a ni a, hemi pah hian concert puitham tak buatsaih ni nghalin Mizoram chhunga artist lar ber ber an inlan. The Prophets, Cassettes, Francis, Fish in the Frame leh SEKI season 1 winner Ramhlun South LC-te an inlan. Mizo mipuite'n SEKI an hlut a, Top 10 aṭang tawh khan Vanapa Hall an khat ṭhap reng a ni ber. Show an chhim satliah a ni loa, mahni veng/khua aiawha telte an thlawp ṭhat bakah performer zawng zawngte, chhimtute'n an thlawp ṭha ṭhin hle.

U-19-ah hian band panga an tel a, vawi eng emaw zat an inel hnuah Dinthar LC-te hi pakhatna an ni ta a ni. Inelna an neih hnuhnung ber, Thawhlehni zanah khan Magdalene hla 'Don't Forsake Me' an sa a, eng hla nge an sak dawn tih hriat loh khawpin anmahni version-in an her danglam thiam. Mipui pawhin an lawm a, an music a solid ṭhat bakah judge-te comment aṭang pawhin judge-te lung an dum tih a chiang. Audition round aṭanga orginal hla inlanpui thei nghal an ni a, chu chuan judge-te a hneh hle ang tih a hriat theih bawk.

Pahnihna chu Chhinga Veng LC band niin anni hi band solid ṭha tak an ni a, an hmuhnawm ṭhinin mipui lawm ber pawl an ni. Anmani style champion pui tum tlat band an ni. Pathumna chu Ramhlun South LC band niin anni band-ah hian hmeichhia pahnih lai an awm a, an music a felfai bawk nen mipui lawm hlawh ber pawl an ni a, band ṭha tak an ni.

U-19 pakhatna hian Rs 25,000, citation leh trophy an dawng a, pahnihna chuan Rs 15,000 dawngin pathumna chuan Rs 10,000 an dawng ve bawk.

SEKI 2022 U-19 Result:-
Pakhatna Dinthar LC
Pahnihna Chhinga Veng LC
Pathumna Ramhlun South LC

Best guitarist Joseph Lalchhandama, Ramthar Veng LC
Best Vocalist Frederick Lalthanpuia, Dinthar Veng LC
Best Bassist C Lalriatfela, Ramhlun South LC
Best Drummer Lalfamkima, Dinthar Veng LC
Best Keyboardist Manase Lalrohlua, Ramthar Veng LC