MDM-in artist-te hnenah Rs. 50,88,720 sem chhuak tawh

Music Domain Mizoram (MDM) 2022-2023 hruaitu tura thlan tharte chuan Ningani khan Synod Conference Centre, Mission Veng, Aizawlah Executive Committee Meeting hmasa ber an nei a, report an pek aṭanga a lan danin an artist-te hnenah Rs 38,46,253 an sem chhuak tawh.

Meeting chu President R. Lalbiaksanga kaihhruaina hnuaiah neiin Finance Secretary Lalnunkenga (Manuna) chuan Finance Report pein, chuta ṭanga a lan dan chuan MDM-in Library-a din tirh, kum 2013 aṭanga Cable TV te’n MDM Library an Subscribe-na man aṭanga MDM Artist-te hnena pawisa an semchhuah chu Rs 38,46,253 a tling tawh a ni.

YouTube aṭanga revenue lo lut an hmuh, zaithiamte hnena an pekchhuah tawh zat chu Rs 12,42,467 tling tawhin, MDM hian artist leh producer-te hnenah sorkar puihna tel loin Rs. 50,88,720 chuang a semchhuak tawh niin Manuna chuan report a pekah a tarlang.

Executive Committee Meeting chuan Lungleiah District Headquarters hmasa ber din a rel a, tuna an term chhung hian District Headquarters tam thei ang ber din an tum a ni. MDM Cell hrang hrang hruaitu tur leh member turte an ruat nghal bawk.

MDM-ah hian member 711 (Mipa 359 leh Hmeichhia 352) an awm mek a ni.