RNYMA Zaipawl music video thar 'Kan Zotlang Ram Nuam'

Ramhlun North YMA Zaipawl chuan 'Kan Zotlang Ram Nuam' tih hla hmanga music video an siam chu an tlangzarh ta a, an music video parukna a ni.

He music video-ah hian tunlai mizo lemchan khawvela hriathlawh tak Papuia Pachuau inlanin, ani hi a video a a laimu changtu a ni a, video tihmuhnawmtu pawh a ni leh e. YMA Zaipawl-ah hian Ramhlun North YMA Zaipawl hi thawm nei lian ṭhin tak an ni a, an music video pakhat 'Thanglunghnemi Zai' (A laia lamte tia hriat lar) phei kha chuan boruak pawh a nei lian hle.

An music video dang 'Tlanglam Zai,' 'AIDS,' 'I Phal Dawn Em Ni' featuring SAGA, 'Ale Ale,' tih leh 'Hrangchhawni Rechheih Zai' music video-te pawh YMA Zaipawl music video-ah chuan ngaihven hlawh pawl tak an la ni vek.

Kan Zotlang Ram Nuam hi hla lar leh sak ngun pawl tak a nih rualin a official music video hi siam a la ni lo a, live performance video erawh a awm nual tawh. Music video ang chuan RNYMA Zaipawl-in an siam hi a hmasa ber a ni a, RNYMA Zaipawl hruaitute chuan he music video hi a hla phuahtu Pu Rokunga tu leh fate phalna la fel vekin an siam niin an sawi.

He music video thar hi Zirtawpni zan khan Ramhlun Indoor Stadium hall-ah RNYMA President Vanlalruata Ralte chuan tlangzarhin RNYMA YouTube channel-ah en theih a ni a, cable TV-ah pawh en theih tura dah luh a ni ang.