Elon Musk-a'n Twitter lei a tum leh lo?

Elon Musk chu $tluklehdinawn 44-a Twitter lei tura inremna an lo siam tawh aṭangin a inhnukdawk niin khawthlang media-te chuan an tarlang.

Khawvela mi hausa ber Elon Musk hian April thla khan Twitter lei a tum thu a lo puangzar tawh a, mahse Twitter lam hian spam leh fake account chungchanga a hriat duh ang an hriattir tawk loh vangin lei a tum chu a ṭhulh leh dawn niin an sawi. Hetihlai hian Twitter lam chuan inremna an lo neih tawh kaltlangpui turin dan anga hmalak an tum thu an sawi ve thung.

May thla khan Musk hian fake leh spam account zat Twitter lamin an la hriattir loh avangin an inremna chu kalpui rih a ni dawn lo tih a lo sawi tawh a, tunah phei chuan lei a tum chu a ṭhulh leh ta niin an sawi.

US Securities and Exchange Commission hnena Musk-a lawyer-in lehkha a thehluhah chuan Twitter chuan Musk-a information hriat duh ang chu an pe duh lo niin a ziak a, "A chang chuan a ngenna chu an ngaihsak lo a, a chang leh an chhan mumal tak awm loin an hnawlsak ṭhin a ni," a ti.