Box office-a pakhatna Guardians of the Galaxy
MTV Movie Awards an sem mek laiin North America-a movie tihchhuah ho zingah chuan Guardians of the Galaxy film pahnihna, Vol. 2 chu sum lalut hnem ber a ni a, kar tawp chhung khan USD mtd 145 zet a hlawh chhuak thei.
Chris Pratt channa, Guardians of the Galaxy Vol. 2 hian kar tawp ni thum chhung khan USD mtd 145 zet a lalut hman a, North America-a theatre 4,347-ah tihchhuah a ni. Kum 2014-a Guardians of the Galaxy ai khan sum a lalut hnem zawk hle a, a lakluh hnem zawkna hi za zela 54 zet a tling.
Ram dangah chuan chawlhkar hnih chhuah a ni tawh a, chawlhkar hnihnaah pawh hian khawvel ram hrang hrang, North America tih lohah hian USD mtd 124 zet lakluh belhin, hengte nen hian ram dang aṭanga sum a lakluh tawh zawng zawng hi USD mtd 282.6 zet a tling. China-ah ringawt USD mtd 48 a thawk chhuak. Guardians of the Galaxy Vol. 2 hian sum a lakluh tawh zawng zawng chu USD mtd 427.6 zet a tling tawh.
He film entu zinga zaa 56 chu mipa an ni a, heng zinga zaa 22 te chu kum 25 chin chung lam an ni. He film entu zawng zawng zinga zaa 72 chu puitling an ni a, zaa 9 chu teenager an ni.
The Fate of the Furious film chu pahnihnaah a tla thla tawh a, USD mtd 8.5 a lakluh belh. India film hlawhtling, Baahubali: The Conclusion chu top 10-ah a la lang pha a, pasarihnaah awmin, USD mtd 3.2 a lakluh belh leh.
“Guardians of the Galaxy Vol. 2” - $mtd 145
“The Fate of the Furious” - $mtd 8.5
“The Boss Baby” - $mtd 6.2
“How to Be a Latin Lover” - $mtd 5.3
“Beauty and the Beast (2017)” - $mtd 4.9
“The Circle” - $mtd 4
“Baahubali 2: The Conclusion” - $mtd 3.2
“Gifted” - $mtd 2
“Going in Style” - $mtd 1.9
“Smurfs: The Lost Village” - $mtd 1.8