Honda BigWing Ṭhazual Gospel ; One In Christ 'Kalvari Damna' pakhatna

Mizo Gospel group lawm hlawh ber zinga mi One In Christ chuan an hla 'Kalvari Damna' chu Ṭhazual Gospel chart-ah pakhatna an nihpui.

'Kalvari Damna' hi R Dokhuma phuah niin mi tam tak hla hriat zawng tak a ni ngei pawh a rinawm. OiC hian he hla hi Music Video hmuh nuam tak nen May thla tawp lamah khan an tichhuak a, ngaihthlak a hlawh hle tih chu YouTube lama thlirtu an pun chak dan aṭangin a chiang. Thla khat chhung vel lekin YouTube-ah thlirtu nuai li chuang an nei thei.

Mizo Idol star Lalhlumawii (Bitei) chu pahnihna niin a hla 'Ṭawngṭaina' chu pahnihna a nihpui. Bitei hian he hla hi a sa mawi bawka, chart-ah hma a sawn chakpui viau. Pathumna chu Amosa Vocal Band 'Kraws, kei mi chawisangtu' kha niin anni pawh hian an dinhmun an sawh nghet chak hle.

Chart-ah hian hming langsar tak tak lang an awm nual. Jenn Ralte chuan 'Ka innghahna' chu palina a rawn nihpui ta a, Jerry Lalrinawma pawhin a hla tihchhuah thar hit tak mai 'Thlarauvin min hruai la' chu top 5-ah a rawn inhlankaipui tawh bawk.

Kristian Ṭhalai Pawl, Ramhlun North Branch, Bethsy Lalrinsangi ft Rindika Zadeng, Lalthansangi leh Tharpuia Hnamte-te pawh top 10-ah an lang a ni.