Rage Against The Machine: Kum 11 hnuah stage-ah an inlan ho leh ta

American funk/rap-metal band Rage Against The Machine chuan "Public Service Announcement" tour chu Inrinni zan khan Alpine Valley Music Theatre, East Troy, Wisconsin-ah an pet hawng ta. Kum 11 lai show an neih tawh loh hnuah Inrinni zan khan show pui tham tak an nei leh ta a ni.

RATM hian kum 1992-a an tihchhuah 'Bombtrack' hmangin show an hawng a, an hla hit tak mai 'Killing in The Name' hmangin show an khar leh. Inrinni zana show an buatsaihah hian an hla lar tak tak an sa nual a, chung zingah chuan 'Bulls On Parade', 'Guerrilla Radio', 'Sleep Now In The Fire', 'Wake Up', leh 'Testify'-te pawh telin Bruce Springsteen-a hla 'The Ghost Of Tom Joad' an cover bawk.

An comeback tour hi August thla laihawl vel thleng an nei dawn a, boruak an neih len chhoh leh viau a rinawm. Kum tam tak chhung show nei tawh lo mah se an rawn kir leh chiah a, an dan ngai te tein beih an rawn leh nghal! U.S. Supreme Court an rawn bitum lehnghal chat mai.

Zack de La Rocha, Tom Morello, Tim Commerford leh Brad Wilk-te hian kum 2020 khan reunion tour hi neih an tum tawh a, mahse hripui leng vangin an sawn hla zel a, kum hnih hnuah an ṭan thei ta chauh a ni.

RATM hi kum 1991-a indin daih tawh kha niin studio album pali an tichhuak tawh a, an studio album hnuhnung ber pawh kum 20 chuang liam ta, kum 2000-a an tihchhuah daih tawh kha a ni.