Bollywood-in Aizawl FC film siam tum

Relegate-a puan an nih aṭanga I-League champion-a rawn tho chhuak thei, Aizawl FC chanchin chu Bollywood lamin an ngaihven a, Bollywood-a producer ten Aizawl FC chanchin film-a siam chungchangah Aizawl FC hotute an dawr.

Football khawvela Mizote hlawhtlinna Aizawl FC hmanga lo lang chhuak chuan Bollywood film siamtute beng a verh a, an ngaihven viau. Aizawl FC hotute chuan Bollywood producer lian tak tak pathumin an rawn biak thu an sawi a, tu emaw ber hi thlan chhuah tur a ni dawn a, tu ber nge ni ang tih chungchangah club hotuten thutlukna an la siam fel lo.

India ram chanchinbu lianten I-League-a Aizawl FC Champion chu 'Fairytale' tiin an sawi nasa a, beisei loh an champion a ni ber mai. Hetianga hlawhtlinna an rawn chan chhoh hian film siamtute beng a thleng satliah a ni lo a, Mary Kom chanchin a hlawhtlin theih chuan Aizawl FC chanchin pawh hi a hlawhtlin ngei ringin Aizawl FC hotute hi an bia a ni. He thu hian India rama chanchinbu liante pawh a nghawr hle.

'Akshay Kumar a chang mai thei' tia titi awm chu Aizawl FC hotute lam chuan thuchiang engmah a la awm loh thu an sawi a, "Producer tihfel hnuah chauh a changtute lam chu ngaihtuah a ni ang," an ti. Producer tur an thlan fel hnuah a film kalphung tur duan a la ni ang a, scriptwriter te rawih an ni ang a, chumi hnu lamah chuan a changtu tur chu a chiang ang; Bollywood actor lian an chan ngei i ring phawt teh ang.