Mumbai khawpuiah Justin Bieber a che ta
A hma aṭanga chanchin ngah, India rama Justin Bieber concert tur chu nizan khan a tling tla ta. Justin Bieber hi a Purpose World Tour kal zelah Mumbai khawpuia DY Patil Stadium-ah a che.
Promoter, Arjun Jain chuan, “Kan company tana concert lian ber a ni mai lo a, India ram chanchin awm tawha concert lian ber a ni,” a ti. Justin Bieber hian India rama hmun pawimawhte a tlawh kual ang a, Arjun Jain chuan Indian food tui ber ber an eitir dawn tih a sawi. Justin Bieber concert-ah hian Mumbai police chuan police 500 leh officer 25 te security lam atan an hmang.
Purpose World Tour hi kum 2015 November 11 aṭang khan Justin Bieber hian a ṭan a, he tour-ah hian United States leh Canada-ah ni 58 chhung concert-na tur a duan chu mipuiin an duh êm avangin a belh chhah leh. Nikum September thla khan he tour-ah hian Bieber hian Australia leh New Zealand a lut, October thla aṭangin Central America leh South America te a fang leh. North America-ah hian tun nipui hian concert a nei leh ang.
Justin Bieber hian mipuiin an duh avangin concert a neih hun tur a belhchhah nual. A belhchhah hnua tour a neihna tura a duan hi North America-ah show vawi 77, Asia-ah show vawi 7, Europe-ah show vawi 61, Ocenia-ah vawi 5, Latin America-ah 11, Africa-ah show vawi hnihte a ni. Concert tour a neih tawh aṭang hian USD mtd 199 zet a lalut tawh.
May 3 khan Tel Aviv, Israel-ah kumina Asia-a a concert hmasa ber aṭan a, May 6 khan Dubai, UAE-ah nei leh, nizana Mumbai-a a concert hnuah Pathianni hian Africa lamah a concert leh ang. Africa-a a concert-na tur hi Johannesburg leh Cape Town, South Africa ve ve a ni. Asia-a concert a neih lehna hmun tur hi Japan khawpui, Tokyo a ni a, September hian a ni ang.
Dr. DY Patil Sports Stadium hi IPL team, Mumbai
Indians home ground a ni a, football lamah chuan ISL team, Mumbai FC home ground a ni
India rama cricket stadium len lamah pakuana a ni a, mi 55,000 an leng
Mumbai khawpuia stadium zinga mihring len hnem berna stadium a ni
2017 FIFA U-17 World Cup India-in a thlen hunah he stadium hi an khelhna tura ruahman zinga mi a ni
He stadium-ah hian tennis hard court pakua a awm a, indoor badminton court pawh pali lai a awm. Hei bakah hian Olympic swimming pool ang tiat pakhat a awm bawk