Unspoken 'Reason deluxe album' July-ah

'In Your Hands' tih hla thiam taka satu Gospel band lar Unspoken chuan Reason deluxe album July hian an tlangzarh dawn. 'In Your Hands' hi Amtea pawhin Mizo ṭawnga letlinga thiam taka a lo sak tawh, Ṭhazual chart-ah pawh No.1 hial a lo thlenpui tawh kha a ni.

Reason Deluxe album hi July 24 hian an tlangzarh dawn a, nikuma an album tihchhuah hralh kal tak Reason-a hlate kha an dah leh hlawm dawn a, mahse hla thar pawh a tel dawn thung. Hla paruk a awm dawn a, hla thar pakhat a awm dawn bakah hian hla pathum chu live recording-a mi a ni anga, Billboard No.1 an nihpui tawh hla 'Reason' leh 'Help Is On The Way' remix-te a awm dawn a ni.

An lead vocalist Chad Matt­son chuan ‘You’ve Always Been' pawh an dahtel dawn tih sawiin, "Vawi tam tak hun kal tawha Pathian inlar dan kan thlir let ṭhin, kan mamawh min pek dan leh hun kan hman mek leh hun lo la awm tura beiseina min pek ṭhin dante nen," tiin an hla chungchang chu a sawi.

An hla thar dan tur hi 'One Step' tih a ni a, kum 17 liam taa  Chad Mattson-a'n ruihhlo a nghei dan chungchang a ni, "Kan hla thar 'One Step' hian a tum ber chu hmun ngaia awm reng lo a ni. Engahmah laktlak lo angah i inngai a nih pawhin pen khat talin i awmna saw rawh,"tiin Chad Mattson chuan a sawi a ni.

On-demand stream-a an hla maktaduai 165 chuan stream nei, music video maktaduai 110 chuang thlirtu nei thei leh album 350,000 leh track 850,000 hralh thei, member pathum awmna Unspoken band hian kum 2012 khan an hla hmasa ber an tichhuak a, Christian music chart hrang hrangah a 'hit' nghal hle.

Kum 2014 khan an LP hmasa ber, an band hmingchawi 'Unspoken' an tlangzarh a, hemi hnuah phei hi Gospel music huangchhungah an mikhual tawh lo hle. 2015 WOW Hits Release-ah chuan an hla 'Lift My Life Up' dahtel a ni der tawh.

Album pathum an tlangzarh tawh a, Unspken hi US main­stream chart-ah No.175 niin, US Christian music chart-ah chuan No.9 a ni thung a, an album dangte pawh hi chart-ah an che ṭha hlawm hle a ni.