Diddy Hip-hop artist zingah a la hausa ber
Forbes chanchinbuin hip-hop khawvela hausate a tarchhuahah Diddy chu a hausa leh ber a, a hausakna hi USD mtd 820 a ni a, billionaire a la tling pha lo. Tun ang zela a hausakna hi a pung a nih chuan tun aṭanga kum nga chhung hian Diddy hi billionaire a ni hman ang an ti. Billionaire ni turin USD mtd 180 chauh a mamawh tawh.
Puffy, P. Diddy, Puff Daddy tia a hming thlak kual ve chhên Diddy hian music lam chauh aṭanga sum lalut chu ni se, hetiang dinhmun hi a thleng pha kher lo ang. Diageo nen Ciroc Vodka-in an sumdawng a, Aquahydrate te, DeLeon tequila tih vel nen sumdawnna lamah an inzarzawm bawk. Kum 2013
aṭang khan digital cable TV network, Revolt a din bawk a, heng aṭangte hian sum a thawk chhuak hnem hle. Kum 2011 aṭang tawh khan Diddy hi hausa ber a ni reng a, khatihlaia a hausakna kha USD mtd 500 a ni a, a pung tawh hle.
Jay-Z chu hip-hop khawvel zinga hausa ber pahnihna a ni a, a hausakna hi USD mtd 810 a ni. A hausakna belhchhahtu lian ber chu a streaming service, Tidal hi a ni a, tuna a hlutna hi USD mtd 600 a ni. Hei bakah hian Roc Nation entertainment company a nei bawk a, Armand de Brignac Champagne-ah hming a chher chho mek bawk.
Dr. Dre chu pathumna a ni a, Beats a hralh hlim kha chuan hausa ber a rawn ni ve a nih kha. Dr. Dre hausakna hi USD mtd 740 zet a ni tawh. Kum 2014 khan Beats chu Apple hnenah USD tld 3 zetin a hralh a, khami kum khan hausa ber a ni.
Birdman chu hausak lamah palina a ni kha a, a hausakna hi USD mtd 110 a ni a, pathumna nen an inthlau hle. Dr. Dre chu panganaah a awm a, USD mtd 90 vel a nei.