Hlimhlimi hla thar 'Ka hausa ber'

H. Vanlalhlimpuii (Hlimhlimi) chuan Zirtawpni zan khan hla thar 'Ka hausa ber' a tichhuak a, YouTube lamah thlira ngaihthlak theihin a dah chhuak tawh.

'Ka hausa ber' hi hla thu danglam tak lo phuah tawh ṭhintu Tiau Trax drummer Ramenga phuah a ni a, ani hian a produce nghal bawk a ni. Kings & Prophets Recording studio-ah he hla hi an record-a, music video simple tak hi Nuna Vanchhawng kut chhuak a ni a, music hi Muanpuia kut chhuak a ni thung.

He hla aṭanga an sum hmuh chhuah zawng zawng chu June 22-a Hlimen dai quarry chima nunna chan ta Lalhruaizela kalsan tak a chhungte tan an hlan dawn a ni.

Hlimhlimi chuan, "'Hla pakhat ka nei a, i sak duh chi a ni mial em lo en teh' Ramenga'n a rawn ti a, ka ngaithla chu a thu hi ka duh nghal a ni. Ka duh thu ka va hrilh nghal a, ka bengah hian Ruatfeli'n sang tak leh mawi taka a sak vang vang lai hi a cham bawk a. A thu hi a nung em a, ka sa mawi zo angem tih ngaihtuah chungin ka 'yes' ta a, a hla thulkhung ti mai ila, Pathian fakna hla a phuah chhun min han sak tir duh hi  ka lawm hle a ni. Lalpa'n hla ṭha tak tak pawh a pek leh ngei ka ring," tiin Ramenga'n hla a pek chungchanga a lawmzia Vanglaini a hrilh a ni.