Boruak bawlhhlawhin solar module a khawih

Renewable resource hmanga kawlphetha siam chhuah a lar mek laiin, India ram ang, boruak bawlh­hlawh nasatna hmun­ah chuan ni zung chakna aṭanga kawlphe­tha siam chhuah hian a nih tur ang a ni pha lo ṭhin.

Duke University-a an professor, Mike Bergin hoa an zirchiannaah, India ram hmar lam bikah ni zung chakna hmanga kawlphetha siam chhuah hi boruak bawlhhlawh avangin siam chhuah tur ang zat an siam chhuak pha lo. Zirchianna aṭanga a lan danin solar panel hmanga kawlphetha siam chhuah hi a nih tur ang a ni pha lo nasa hle.

India hmar lamah solar panel aṭanga ni zung chakna an seng theih zawng zawng zaa 17-25-in boruak bâl avangin an seng theih loh phah. Ni zung chakna seng vek tura daltu lian ber chu vut nawi leh boruak nawi ten solar panel an bawh balh vang a ni. Solar panel an bawh balh avang hian ni zung eng emaw zat chuan a thlen tur hmun a thlen theih loh phah a ni.

Ni zung daltu lian tak dang pakhat chu bo­ruak bawlhhlawh avanga romei zâm nasa hi a ni leh. Romei hian lei thleng tur ni zung a lo dang ve a, hei vang hian nasa takin ni zung chakna hmanga kawlphetha siam chhuah tur a tihtlem phah. India sorkar hian ni zung chakna hmanga kawlphetha siam chhuah hi a thupui langsar tak pakhat a ni a, kum 2022 khian ni zung aṭangin kawlphetha megawatt 10,000 thar chhuah hman a tum.

India chauh ni loin ram eng emaw zatah chuan boruak bawlhhlawh avang­in ni zung chakna an lak theih tur ang an la pha lo nasa hle. Iraq khawpui Baghdad-ah pawh kum 2016-a an zirchiannaah khan solar module thla khat chuangte an tihfai loh avangin an kawlphetha lak tur zat aia zaa 18.74 ngawtin an lak tlem phah a ni. USA-a Colorado-ah pawh kawlphetha an lak tur aia zaa 4.1 tlem an lak phah bawk. Solar panel in nei a nih chuan a tihfai lam pawh ngaihthah loh a ṭha.