Asus phone thar India-ah tichhuak

Taiwan company Asus (Mizo ṭawng taka a-sus tia lam, eisus emaw eisas emaw ni loin) chuan an phone siam thar, Asus Zenfone Go 5.5 chu India-ah an tichhuak a, tuna Amazon-in Great Indian Sale an neih mekah pawh zawrh chhuah nghal a ni.

Zenfone Go 5.5 hi Rs. 8,499 man a ni a, rawng chi thum duhthlan tur a awm. A display hi 720 x 1280 pixel a ni a, a chipset-ah 1.0GHz quad-core Qualcomm Snapdragon hman a ni a, graphic processing unit-ah hian Adreno 360 a hmang. RAM hi 2GB a ni a, internal storage hi 16GB-a lian a ni a, microSD card pawh a vuah belh theih a, mahse 128GB aia lian erawh a theih loh thung.

Camera hi a mega pixel aṭang chuan a ṭha ve hle a, a hnung lam camera hi 13MP a ni a, a hma lam hi 5MP a ni. A hnung lam camera hi dual LED real-tone flash-a thuam a ni. Android Marshmallow a la hmang a, a battery hi 3000 mAh a ni. GPS leh GLONASS te a hmang thei bawk.