Bethsy channa film Damna Kim An tichhuak ta

‘Damna Kim’ film hi Salem Unit ṬKP te buatsaih a ni a, zai­thiam lar Bethsy Lalrinsangi chu a changtunu ber a ni. He film-ah hian Bethsy hi call girl lemah a chang. Mi pahnih thawnthu thlur a ni a, pakhat chu harsatna hrang hrang paltlang hmeichhe pakhat a ni a, he hmeichhe lemah hian Bethsy a chang a, pakhat chu chhungkaw pakhatin fa anga an lak Rintea chanchin a ni. Rintea lemah hian Robin-a chang. He film thawnthu hi B. Lalbiakvela ziak a ni a, ani hi director a ni bawk. F. Malsawmkima chu Director of Photography a ni a, film hi MSpace kutchhuak a ni.

He film siamtute chuan nun kawng rappelh laklawh tawh ṭhalai, nun beidawng leh mang­ang ngawih ngawihten Damna Kim nei tura Isua pan duhna an neih phah ngei an beisei.

He film-a hi thla ruk vel chu shot a ni a, a changtunu Bethsy hian hemi chhung hi chuan programme tam tak a ṭhulh phah. “Film chan chu rin aiin a harsa reuh a, a bul ṭan tir lam thla hnih khat chu harsa hle a, a hnu lamah erawh a thawnthuah tih takzetin ka chêng a ni,” a ti. Film siamtute chuan “Bethsy hian a chang uluk hle a, scene pakhatah phei chuan ṭap lem lem loin, a ṭap tak tak hial a ni,” an ti.

Aizawla Vanapa Hall-ah hian Damna Kim film hi Ramhluna Hnamte chuan a tlangzarh a, Lungleia Saikuti Hall-ah, Rev. Lianchhunga Khiangte, MṬKP Organiser-in a tlangzarh thung. Hmun hrang hrangah chhuaha kalpui tur a ni dawn a, chhuah duh tan 9862658900 ah emaw 8974243095-ah te biak theih a ni.