Khualzinte tlawh nasat France

World Tourism Organization-in a tarlan danin khawvel ram hrang hrang zingah France chu khualzintena an tlawh nasat ber ram a ni a, he rama mipui awm zawng zawng aiin tlawhtu mikhual a ngah zawk.

France hi hmanaṭangin khualzintena an tlawh nasat, khualzin hiptu lian ber ram a ni deuh reng a, an ram tlawhtu hi an ram mihring zawng zawng aiin an tam zawk. France ramah hian mihring maktaduai 61 vel an awm a, chutihlai chuan khualzin, an ram tlawhtu zawng zawng hi kum khat chhungin maktaduai 84.5 zet a nei a, a kum têlin France ram tlawhtu hi an pung.

Ram pawn aṭanga France tlawhtu hi an ṭha­hnem avangin France ram chuan sum tam tak a lakluh phah a, an ram GDP za zela 9.7% hi khual­zinte aṭanga a hmuh a ni. Khualzinte aṭanga sum a hmuh zawng zawng zaa 30 chu ram pawn aṭanga France tlawhtute aṭanga a hmuh a ni a, zaa 70 erawh hi chu France ram chhunga mite tho, an ram chhunga an zinkualnaaṭanga a hmuh a ni thung. Paris, Lyon, Strasbourg, Alpine mountain, ski resort tih velte hian mi a hip hle a ni.

France dawttu khualzin ngah leh chu United States a ni a, kum khatah khualzin maktaduai 77.5 a dawng sawng a, Spain-in khualzin maktaduai 68.2 dawngin pathumna a ni a, China chu pangana niin, khualzin maktaduai 56.9 a nei a, Italy chu khualzin neih tam lamah parukna a ni a, khualzin maktaduai 50.7 a dawng.

Hetihlai hian tourism aṭanga sum hmu hnem ber chu US a ni thung a, USD tld 204.5 zet a hmu. China chu pahnihna niin, USD tld 114.1 a hmu a, Spain chuan USD tld 56.5, France-in USD tld 45.9 leh, United Kingdom-in USD tld 45.5 te an hmu.