MSL 3 Dance Battle Final Final-ah dance crew pathum

Mizoram Super League khelh mekah a vawr tawp a thleng hnai tawh a, Dance Battle-ah pawh finalist an hriat ta. Kum dang ang lo takin kumin chuan final-ah dance crew pathum kan hmu dawn. Finalist-te hi Mizo Rap Challenge leh Bhangra Challenge hmangin an inel dawn, a hmuhnawm viau ang.

Kumin MSL Halftime Dance Battle Final atan hian kum dang ang lovin crew 3 thlan an ni. Heng crew pathumte hian Final zan khatna leh zan hnihnaah theme hrang hmangin an intihsiak dawn a, an point pahnih belhkhawm hian pakhatna, pa­hnihna leh pathumna a hril dawn a ni. Dance Battle Final zan khatna hi tunkar Thawhlehni zan hian neih a ni ang a, Ningani zanah zan hnihna a awm leh ang. Best of Three a nih avangin zan thumna hi Zirtawp zanah khelh a ni thung dawn.

Finalists dance crew te hi GOV, Dem Boys leh Emerge te an ni. Emerge hi Season 1 aṭang khan MSL Halftime dance battle-ah hian an la tel ziah a, final lut pha lo chiah chiahin an tla ṭhin. Kumin hi final an luh vawi khat na a ni a, pakhatna nih pawh an tum hle. GOV hi Season 1 khan BGMX hming puin an lo tel tawh a, nikum khan video audition-ah tling zo lo. Kuminah nasa taka hmasawnin an rawn let leh a, hmahruaitu langsar tak an ni mek. Dem Boys ve thung hi MSL Dance Battle hrim hrima an vawi khat rawn inlanna a ni. Mipui lawm an hlawh a, ṭantu pawh an ngah nghal hle. Kum­in hi mipa hlang veka Final Dance Battle kan neih vawi khatna a ni.

MSL Halftime Dance Battle Final Rounds atan hian Judge ten Dance Crew-te hi Theme an thlansak a, hemi theme zul zui hian an rawn lam dawn. Theme an rawn pho lan thiam dan te, an idea neih ṭhat leh creativity ten an point thui tak a rawn hril dawn a ni.

Mizo Rap Challenge

Final zan khatna, Thawhlehni zana khelh tura theme atan hian Mizo Rap Challenge thlan a ni. Hetah hian Michael M Sailo hriatreng nan a hla pakhat ṭheuh dance crew ten lâm nan an rawn hmang dawn. Hei bakah hian, tunlai Mizo Rapper larte hla pakhat an hmang tel ṭheuh bawk dawn a ni.

Bhangra Challenge

NBA lamah pawh Bhangra Empire te Halftime Show-a an lâm kan lo hmu fo tawh ṭhin. Indian cultural dance lar chak ber pakhat hi tunlai style taka rawn tidanglamin khawthlang ram lam pawh a deng chhuak mek. MSL dance crew te hian Bhangra hi an choreography-ah rawn telhin, an lam style mil deuh siin an rawn lam chhuak dawn. Tunlai hla hrang hrang, Punjabi beat mila remix an pawt ṭheuh a, an hla pawh leh an mahni hla thlan te hmangin an rawn lam dawn a ni.