North East Food Promotion 'Chef's Palette' nei dawn

Mizorama a vawi khatna turin Curry Pot restaurant, Aijal Club-ah zanin leh Zirtawpni zanah North East Food Promotion neih a ni dawn.

He hun hi 'Chef's Palette' tih niin Zo Mushroom leh Fame Entertainment hmalaknaa buatsaih tur a ni a, Chef Joel Basumatari hoa neih tur a ni. Chef Joel Basumatari hi Food Superstar India top 30 Cheff 2022-a thlan zingah telin, UK lamah a thawk ṭhin a ni. Amah hi Slow Food Community Nagaland for Biodiversity & Heritage Preservation founder a ni a, NE Food Show Chef's War 2019 winner a ni bawk.

Zan dar 7-ah hun hman ṭan a ni dawn a, zaninah hian Naga thali ei tur chi hrang hrang sawm a awm dawn a, ei man chu mi pakhat tan Rs 1500 a ni ang. Zirtawpni zanah chuan hmarchhak hmun hrang hranga ei leh inte hmangin four course menu siam a ni thung dawn a, ei man chu mi pakhat tan Rs 2000 a ni ang. Hetah hian tualṭo thlai leh bawlhlote hman a ni thung dawn a ni.

Ei leh in lama tui mite tan chuan kal manhla hle tura ngaih a ni a, hrechiang duh tan chuan Ph. 9863873738-ah zawh chian theih reng a ni.