King Arthur-in Guardians of the Galaxy a la tluk lo

Guy Ritchie film thar, King Arthur tihchhuah ni mah se, Guardians of the Galaxy Vol. 2 a la tluk thei lo. Kar tawp chhung khan North America-ah chuan Guardians of the Galaxy Vol. 2 bawkin pakhatna a luah leh.

Guardians of the Galaxy Vol. 2 hi chawlhkar hnihna atan North American box office-ah pakhatna a luah leh a, kar liam ta chhung khan USD mtd 63 zet a thawh chhuah belh leh. Heti hian tuna a sum lakluh belhte nen GOTH Vol. 2 hian North America-ah USD mtd 246 a lalut tawh a, khawvel pumah chuan USD mtd 633 zet a hmu tling tawh.

Snatched film chu sum lakluh tam lamah pahnihna a ni a, USD mtd 17.5 a lalut. He film hi USD mtd 42 senga an siam a ni a, tun ṭumah hian theatre 3,501-ah chhuah a ni a, an budget pawh an la hmu tling lo nasa hle; amaherawhchu an zâm lo, an sum senso hi chu an hmuh tlin theih an ring.

Guy Ritchie film thar ‘King Arthur: Legend of the Sword’ chuan beisei a pha lo hle a, pathumna a ni pha ṭawk. USD mtd 175 senga an siam film hian kar tawp chhung khan USD mtd 14.7 chauh a lalut a, David Beckham pawh a chan vena film hmabak hi a la ko hle. North America chauh ni loin, khawvel hmun dangah pawh a che ṭha lo hle a, ram 51 aṭangin USD mtd 29.1 chauh a lalut. Baahubali 2: The Conclusion pawhin USD mtd 1.5 lalutin top 10-ah a la lang pha.

“Guardians of the Galaxy Vol. 2” - $mtd 63

“Snatched” - $mtd 17.5

“King Arthur: Legend of the Sword” - $mtd 14.7

“The Fate of the Furious” - $mtd 5.3

“The Boss Baby” - $mtd 4.6

“Beauty and the Beast (2017)” - $mtd 3.9

“How to be a Latin Lover” - $mtd 3.7

“Lowriders” - $mtd 2.4

“The Circle” - $mtd 1.7

“Baahubali 2: The Conclusion” - $mtd 1.5