Spotify: Russia leh ramdang 12-ah an inzar pharh leh

Spotify Technology chuan Thawhlehni khan music-a international market ṭhan chakna ber Russia-ah an music streaming service an tlangzarh thar a, Russia bakah hian ram dang 12-ah an tlangzarh bawk.

Russia bakah hian Albania, Belarus, Bosnia & Herzegovina, Croatia, Kazakhstan, Kosovo, Moldavia, Montenegro, North Macedonia, Serbia, Slovenia, leh Ukraine-ahte an market huang an zauh ta a, heng ram 13-ahte hian free subscription-in bul an ṭan phawt a ni.

Spotify Chief Executive Daniel Ek chuan ram 92-ah an inzar pharh tawh dawn tih sawiin, hripui leng kara chak taka an market ṭhanna avangin heng rama an service tlangzarh tur hian ruahmanna an siam theih phah tih a sawi.

International Federation of the Phonographic Industry-in a tarlan dan chuan Russia hi khawvela music streaming marker lian 17-na a ni a, rimawi ngaithla ṭhin 87% vel zet chuan online-in an stream mai ṭhin niin an tarlang. Customer maktaduai 250 vel lai  chu awm belh theih turah an ngai.

Spotify markets and subscriber growth vice president Gustav Gyllenhammar chuan kar hmasa khan khawvel pum huap anga an elpuite aiin an local thei zawk a, chutih rual chuan, local lama an elpuite aiin khawvel pum huap angin an kal thei zawk bawk tih a lo sawi tawh a, helam hawi zawng hian nasa takin hma an la mek ni pawhin a lang.