WannaCry Ransomware NSA siam misual kutah

Tunlai khawvela computer tibuaitu WannaCry Ransomware hi National Security Agency hriatpuina leh enpuina hnuaia siam kha a ni a, chumi hnuah hacker-ho kutah a lut a, tunah chuan khawvelin an buaipui ta.

UK-a damdawi in tam tak chuan an buai phah hle a, an damlote chanchin­ah an lut thei lo a, damlo ngaihtuahawm ngawih ngawihte profile-a an luh theih nan he virus tidarhtute hnenah hian pawisa an pe ringawt. France-ah chuan motor siamtu lian Renault chuan an thil siam lai an chawlh­san rih a, Russia-a Interior Ministry computer tam tak chu an tihlum tawp rih bawk.

WannaCry hi April thla khan hackers group pakhat, ShadowBrokers chuan an tichhuak; he pawl hi tute nge an nih tih te, an nihna chiang engmah hriat a ni lo. Sha­dowBrokers hian National Security Agency hnen aṭanga an ruk chhuah nia hriat a ni. NSA hian an hmelmate computer beih nana an hman ṭhin chu mi ṭhenkhatten anmahni mimal hlawkna atan an lo hmang ta a ni. Mi tam takin NSA hi an dem hle a, Microsoft software chak lohna an hre reng si, Microsoft hnena hrilh lo a, an lo vawn ruk daih chu ṭha lo an ti hle.

Britain-a an tawrh nasat chhan ber pakhat chu Britain-a hriselna lam en­kawltu, National Health Ser­vice hi Windows XP-ah khan an la innghat hle a, he software hi kum 2014 aṭang khan Microsoft chuan a update-na tur a ti­chhuak tawh lo. Khawvel pum­a computer zaa 5 aṭang­a 10 vel hi Microsoft XP hmang kha an la ni. He­tianga khawvel a buai takah chuan Microsoft chuan NSA leh intelli­gence agency dangte hnen­ah an software siama ṭha tawk lo awm laite an­mah­ni hrilh ṭhin turin an ngen.

Ransomware kan tih chuan computer virus chi khat, mi computer va bei a, a neitutena an hman theih loh tura file-te lo block-tu, hman a nih leh theihna tura sum phut ang chi hi a ni. Computer virus kan tih hian natna hrik, virus tak tak ni loin, computer software chi khat a ni.