Black Entertainment Television Awards-ah Beyonce a lang hnem
Black Entertainment Television Awards nominee puan chhuah a ni a, Beyonce chu tuma tluk rual lohin category hrang hrangah a lang hnem ber.
2017 BET Awards nominee puan chhuahah hian Beyonce chu category pasarihah ngawt a lang. Kum 35 mi, nau pai mek hi Best Female R&B/Pop Artist-ah a lang a, a lanna langsar dangte chu Kendrick Lamar nena an sak dun ‘Freedom’ avangin Best Collaboration, Video of the Year leh a album Lemonade hmangin Album of the Year-ah te a ni.
Bruno Mars chuan Beyonce-i a dawt a, category pangaah a lang. Bruno lanna langsar zingah Album of the Year, Best Male R&B / Pop Artist leh Video of the Year te chu mite ngaihven zual a ni. Beyonce-i laizawn, Solange Knowles chu category paliah lai a lang.
Movie category lamah chuan Best Actress-ah Viola Davis, Taraji P. Henson, Gabrielle Union, Issa Rae leh Janelle Monae te ho an awm tlang a, Best Actor-ah Denzel Washington, Donald Glover, Bryshere Y. Gray, Mahershala Ali leh Omari Hardwick te hming a lang bawk.
BET Awards-ah hian category 19 lai a awm a, a dawngtu tur hi Voting Academy ten an thlang ang; he academy-ah hian professional leh fans-te an awm. BET Awards hi Los Angeles-a Microsoft Theater-ah June 25 hian sem chhuah a ni ang.