Pantera an lo let leh dawn e! Kum 20 dawn hnuah tour an nei leh dawn

Pantera fan-te tho ru, Pantera pawh an lo tho leh dawn e!

An keh darh aṭangin kum 20 dawn a liam ta. An guitarist ropui Dimebag Darrell-in fam a chansan tawh a, an drummer duhlai Vinnie Paul a boral tawh bawk. Chuti chung chung chuan an band member la dam pahnih Rex Brown leh Phil Anselmo-te chuan nakkumah reunion tour North America-ah an nei dawn.

Brown leh Anselmo-te hian Artist Group International chu inremna ziahpui tawhin an agent turte pawh an tifel tawh a, Dennis Arfa and Peter Pappalardo-te chu an agent tur an ni ang. "Band ropui tak kan thawhpui thei tur leh an music-te an fan-te hmaa kan chhawp chhuak leh thei tur hi kan phur tawh hle," tiin Paparalardo chuan a sawi hial.

Pantera hi khawvela heavy metal history-a band hlawhtling ber leh huhang ngah ber pawl an ni a, thrash leh hardcore metal mawi taka an pawlhte chu a ngainatu tan chuan a aia rimawi dang a awm chuang lo.

Kum 1981-ah daih tawh khan he band ropui hi Abbott brothers (drummer Vinnie Paul leh guitarist Dimebag Darrell)-te chuan dinin vocalist Phil Anselmo leh bassist Rex Brown-te nen a hunlai chuan khawvel an deng chhuak a ni ber. Album pawh copy maktaduai 20 chuang an hralh hial.

'Cowboys from Hell' leh 'Cemetery Gates'-te phei chu vawiin thlenga thrash metal music tuipuitute chaw tui ber a la ni ti ila kan sawi sual awm lo e. Kum 2021 khan Pantera hian chawlh lailawk an puang a, kum 2003-ah an keh darh thu an puang. Chumi hnuah chuan Abbott unaute chuan band dang dinin Damageplan an din a, Ansemo pawhin solo project hrang hrang buaipui zuiin Brown nen pawh hian an thawkdun leh a ni.

Mahse, December 8, 2004 khan guitar legend Dimebag Darrell chu Damageplan-in Columbus, Ohio-a concert an neih laiin stage-ah kahhlum a ni. Kum 2018 khan a unaupa Vinnie Paul pawh chu lung lam natna vangin thi lehin tunah chuan Anselmo leh Brown chiah an dam tawh.

Tute'n nge Abbott unau thlak dawn puanzar a la ni loa, Black Label Society guitarist, Dimebag-a ṭhianpa Zakk Wylde hming sawirik a lo awm zuai tawh chungchang erawh thu thang dik lo a nih thu Anselmo chuan a lo sawi tawh thung.