Alex Rodriguez-a'n Jennifer Lopez a fakna chu

New York Yankees player hlui Alex Rodriguez chuan a ngaihzawng hlui, a lo inhualpui hial tawh Jennifer Lopez chu a fak hle a, a chungchang ṭha lam bak sawi tur a hre meuh lo.

Ningani khan baseball superstar hi Martha Stewart Podcast-ah telin hetah hian Lopez chungchang hi a sawi chhuak a ni.'Jennifer-i chungchangah chuan hei hi ka hrilh ang che- midang bulah pawh nimin lawk khan hemi chungchang hi ka sawi tawh- ka bula awm tawh mihringah chuan talent a la nei ṭha ber. Thawkrim ber a ni bawk. La damlai zingah chuan live performer ropui ber a niin ka hria," tiin Lopez a fak hle.

Kum 46 mi Rodriguez chuan an inṭhen hnuah pawh ṭha takin hun a hmangzui zel tih sawi bawkin inchhirna a neih chuan loh thu a sawi. "Tuk tin hian hriselna ka neih avang te, ka fanu duhawm tak tak pahnih, tuna kum 17 leh 14 ni ve tawhte ka neih avangte hian Pathian hnenah lawmthu ka sawi ziah a ni," a ti bawk.

Rodriguez leh Lopez hi kum 2017 kumtir lamah khan an inzui ṭan a, kum 2019 khan an inhual thu puangzarin inneih pawh an tum hman a, Covid-19 vangin vawi hnih lai an inneih tur pawh an ṭhulh hman. An innei mai dawn emaw tih laiin April, 2021 khan an inṭhen thu an puang leh ta zawk a ni.