Ronnie James Dio: Holy Diver kha Black Sabbath tana a phuah!

Fam ta, rock legend Ronnie James Dio nupui Wendy Dio chuan Dio hla hit 'Holy Diver' kha a nihna takah chuan Black Sabbath tana a phuah a nih thu a sawi mauh mai!

Kum 2010-a pumpui cancer vanga kum 67 mi nia boral ta Dio khan kum 1979 khan Ozzy Osbourne thlakin Black Sabbath a zawm a, studio album pathum- 'Heaven and Hell' (1980), 'Mob Rules' (1981) leh 'Dehumanizer' (1992)-te kha Ronnie James Dio hoa an tihchhuah a ni.

Full Metal Jackie-in Dio piancham kum 80-na puala a thihsan tak a nupui Wendy a kawmnaah Wendy chuan hemi chungchang hi a sawi a, 'Holy Diver' leh 'Don't Talk to Strangers'-te kha Sabbath-a a tel laia a phuah a nih thu a sawi. Mahse heng hla pahnihte hi Dio album-ah telh a ni ta zawk thung.

Ronnie James Dio kha heavy metal vocalist ropui berah mi tam tak chuan an ngai a, 'devil horns' tilartu ber nia hriat niin Classic Rock Magazine phei chuan kum 2006 khan 'Metal Guru Award' a hlan hial a ni. Revolver Golden Gods Awards 2010-ah pawh 'Best Metal singer'-a puan a ni tawh bawk.

Band lar tak tak- Rainbow, Black Sabbath leh Dio-ahte a tel ṭhin a, heng band ropui tak tak bakah hian project dang eng emaw zatah a tel bawk a ni.