Nilaini zan Thla eng kha...

Nilaini zan Thla eng zet kha chu Zofa, a bikin ṭhalaite'n an lawm takzet tih a chiang. Phone camera a ṭha tawh bawk nen, social media lamah Thla eng hlim thla hmuh tur a tam viau mai.

'Chhawrthlapui lo chhuk rawh, inkawm ang' tih hla chu status thar thlir apiangin ngaihthlak tur a awm tel emaw tih mai tur khawpin ṭhalaite'n Nilaini zan thla eng kha an lawm. Veng ṭhenkhatah chuan thla eng lawma khawlaia zaite pawh hriat tur a awm.

Kha Thla eng kha khawthlang ṭawng chuan 'Supermoon' tih a ni a, kumin atan chuan Thla bial lang len ber zan a ni a, Nilaini zan bika mi kha 'Buck Moon' an tibawk.

Astronomy magazine lamin an tarlan dan chuan 'Supermoon' tih hi astrologer Richard Nolle-a'n kum 1979-a a phuah a ni a, perigean full moon sawina atana a hman a ni. Thla-in Khawvel a hnaih lai bera a landan sawina turin perigean full moon hi hman a ni a, July 13 zan bik khan kumina 'Supermoon' hnai ber a ni nghe nghe.

Nilaini zanah khan ṭum dang angin Thla kha 14%-30% velin a lang eng zawk lehnghal niin Space.com chuan a sawi a, 'moon illusion' vangin Thla pawh kha a lang lian zawk bawk niin an sawi.

Aphelion vangin Khawvel leh Ni a inhlat lai ber a lo ni ve chiah bawk niin mithiamte chuan an tarlang a, Khawvel leh Thla erawh km 3,57,264 chiahin a inhlat thung. A tlangpuiin Thla leh Khawvel hi km 3,84,400 velin a inhlat ṭhin a ni.