MSL Season 2 Champion Riborn Crew Zaninah an inlan dawn

MSL Season 3 Dance Battle chu a vawrtawp atan intihsiakna neih mek a ni a, Thawhlehni zana zan khatnaah Mizo Rap Challenge hmangin inel a ni a, zanin hian Bhangra Challenge hmangin an inel leh ang. Hei bakah hian MSL Season Dance Battle champion Riborn Crew an inlan dawn.

MSL Season 3 Dance Battle Final zan hnihnaah hian MSL 2 Dance Battle champion Riborn Crew te an rawn lam dawn a, opening performance an chang ang. Riborn Crew hi kumina finalist crew te nen an lam ho dawn a, Bollywood lam rawngkaiin an rawn lam dawn. Choreograpgher hi MSL Dance Battle judge Alan Rinawma a ni a, Mizo lâma kan hmuh ngai zen zen loh an rawn entir ang.

MSL Season 3 khelh mekah, Final zan khatnaah Khatla TBL-in hma an hruai a, a match hnihna hi zanin hian khelh a ni leh dawn. TBL an chak leh chuan MSL Champion an ni tawh ang a, Vikings an chak erawh chuan champion tur zawn nan 3rd match khelh leh a ni ang.

Halftime Dance Battle bikah Mizo Rap Challenge hmangin Dance Crew te an rawn intihsiak tawh a, an thiam a rual a, ṭhatna lai nei ṭheuh leh hnufualna lai nei lutuk lo vek an ni a, an point score poh a rualkhai hle. Zanin hian Season 3 atana a tawp nan, Bhangra Challenge hmangin finalist crew te hi an rawn intihsiak leh dawn. Hetah hian tunlai hla lar, bhangra remix version hmangin an lam dan style leh Bhangra te rawn mix-in an rawn che hlawm dawn. Dance Battle Champion tur thlan nan zanin an performance hi a pawimawh hle dawn a ni.

MSL Halftime Dance Battle result hi zaninah peih fel a ni dawn. Mahse zaninah Basketball bika Champion a hriat nghal chauhin dance battle result hi puan a ni ang. Deciding match Zirtawpni zana khelh leh a ngai dawn a nih erawh chuan, Zirtawp zan hian result puan a ni thung ang. Lawmman pakhatna hian Rs. 20,000 leh certificate a keng tel a, pahnihnain Rs. 10,000 leh certificate, pathumn in Rs. 5,000 leh certificate te a keng tel.