Baahubali 2-in cheng tluklehdingawn 14 a lalut tling
India film hlawhtling Baahubali 2: The Conclusion chu India ram aṭanga film tihchhuah tawha hlawhtling ber a nihzia a pholang chiang tawh hle a, chawlhkar thum chhuah tawhah Rs. vbch 1,450 (tluklehdingawn 14.5) a lalut tling ta.
Kum 2015 khan Baahubali: The Beginning tihchhuah a ni a, a hlawhtling hle; khawvel pumah cheng vbch 650 zet a thawk chhuak. Kuminah Baahubali 2: The Conclusion chu tihchhuah a ni leh a, hei zet hi chuan Indian film history-ah hnuhma lian pui mai a rawn hnutchhiah ta a ni.
Baahubali 2: The Conclusion hian khawvel pumah cheng vbch 1450 zet a thawk chhuak tawh a, Hindi version ringawt pawhin Rs. vbch 500 zet India-ah a lalut. India pumpuiah, Hindi version, Telugu, Tamil leh a dang zawng nena sum a lakluh tawh zat hi cheng vbch 1,189 zet a ni a, a hlêp ti mai ila, net income pawh Rs. vbch 925 zet a tling tawh. India ram pawn aṭanga sum a lakluh zawng zawng hi Rs. vbch 261 zet a ni tawh bawk.
South India lam chhuak a ni bawka South India lamah phei chuan che ngap ṭhat ṭhat tak a ni. Tamil Nadu aṭang ringawtin Rs. vbch 100 zet a lalut a, Kerala-ah chuan film tihchhuah tawh zinga Rs. vbch 50 lalut tling rang ber a ni. Andhra Pradesh leh Telangana-ah ringawt hian Rs.vbch 285 zet a lalut.
North American box office-ah pawh top 10-ah a lang pha a nih kha. North America aṭanga sum a lakluh tawh zawng zawng hi USD mtd 20 a ni a, May 14 thleng khan USA aṭang chauh pawhin USD 18,256,999 a lalut.