Soundgarden leh Audioslave frontman Chris Cornell Beisei lohin khawvelin a thlah

80s leh 90s chhoa band lar, Soundagarden-a an frontman, kum 2000 chhoa khawvela band hriat hlawh Audioslave-a an frontman ni bawk, Chris Cornell chu nat lâwk a neih em em pawh hriat lohin, Nilaini khan a thi.

Chris Cornell hi engtia thi nge tih hriat a ni lo a, Detroit-ah Soundgarden-a a band mate-te nena show an neih zawh hnu lawkah a thi thut niin a thupuangtu, Brian Bumbery chuan a sawi a, a sawi dan chuan 'kan beisei loh' a ni a ti; a ṭhâwng hle. A thih chhan hi hriat tuma beih mek a ni a, hemi chhung hi chuan an privacy zahsak turin khawvel media-te a ngen nghal.

Chris Cornell hming dak tak chu Christopher John Boyle a ni a, kum 1964 July 20 khan Seattle, Washington-ah a piang a, kum 1984 khan Soundgarden band an din a, a hnu zelah an hlawhtling hle. Hun eng emaw chen an band an chawlhsan hnuah kum 2010 khan Soundgarden chu an insiamthar leh an studio album parukna an tichhuak.

Audioslave band hi Chris Cornell bakah, Rage Against the Machine-a mi Tom Morello te nen kum 2001-a an din kha a ni a, hei pawh hi khawvela band hlawhtling berte zinga mi a ni tho mai. Album pathum an tichhuak a, Grammy-ah pawh vawi thum lai nomination-ah an lang.