India-ah India aiin China hlawhtling zawk
Micromax te an lar ve vei ṭhin nen China smartphone company-te an rawn lan chinah India-a smartphone siamtute an tawm nghal ta rawih rawih mai. Tunah chuan mi tin mai hian ‘Xiaomi, Huawei, Oppo’ kan ti kan ti ta mai.
Kum 2013 aṭang khan India-a smartphone siamtute hian China smartphone siamtute aṭangin chak loh bul an ṭan chho a, kum 2017 kan thlen meuh chuan an chak lo viau tawh a, an bet rawk rawk tawh a ni ber mai.
March thla thleng khan India ram smartphone market-a India-a mi smartphone siamtute share chu 13.5% chauh a ni ta; a hma kum kha chuan 40.5% lai a la tling pha. Nikum March thlaa Indian vendors-te smartphone shipment chu maktaduai 9.52 a nih laiin kumin chuan mtd 3.65 chauh a ni tawh.
China-a smartphone siamtutena India market-a an share erawh nasa takin a pung a, kum hmasaa 21.2% chauh kha kuminah chuan 51.4% zet a ni tawh. Xiaomi leh Lenovo ten online sale-ah hmun ropui an chang a, Vivo leh Oppo ten retail store lamah ropuina an chang thung. Samsung pawhin hma a sawn viau. India-a miten China an ngam loh viauna chhan nia expert-tena an sawi chu mipui mamawh angin an inthlak danglam lo tih a ni. Phone hralh chhuaha kori tu em emtu chu hardware ṭha - camera ṭha leh a screen hlai zawkte a ni. Smartphone hralh chhuah zinga a zat ve zet hi a thlalakna pawh 13MP leh a chung lamte an ni.