Manuna Solo-in a kal zel ; Music video thar a tichhuak

Hard Ray-a an vocalist Manuna chu solo-in a la kal zel a, music video thar pawh a peih a, a tichhuak leh ta. Amalin kal mah se, a music video siam engkimah a band, Hard Ray ten an la pui zel thung.

Manuna hla thar hi ‘Duhaisam’ tih a ni a, a ṭhianpa nena kum 2013-a an phuah daih tawh kha a ni. Ṭhazual chart-ah pawh hlawhtling ṭhin a ni a, Manuna hla thar pawh hi a thlen sân beisei ila, kan tisual lutukin a rinawm loh. ‘Duhaisam’ hi Princeton Records-a an record a ni a, video hi Gabriel Graphix kutchhuak a ni.

Hard Ray band angin thil ti tawh mang loin, Manuna hi solo-in kal rih tawh mah se, Hard Ray band-a a ṭhian­te khan an la pui nasa hle. Manuna chuan, “Ka hlaah hian Hard Ray-a ka bandmate te kha an tel vek a ni mai. Kawng engkimah min pui a, ka lawm tak tak a ni,” a ti. “Music leh voice mixing hi Hard Ray-a mi Remtea’n a khawih vek a, video pawh hi kan bassist Mawitea nen kan ti dawn a, mahse a remchan leh tak loh avangin Gabriel Graphix chuan nalh zetin min siamsak a ni,” a ti.

‘Duhaisam’ hla hi kum 2013-a an phuah tawh a ni a, record tawh, mahse tuna siam ṭhat leh a ni. Manuna chuan, “A tir berin Foster-ah kan record a, mahse ka duh aiin a key a hniam. Chumi hnuah Vortex-ah a tempo tirang deuhin, a key pawh tisang deuhin kan record leh a ni. A hnuah Princeton-ah a tempo leh key bawk tihsan belhin ka record leh ta a ni. A hmaa mi kha a recording chu a ṭha vek a, ka duhthu pawh a sam a, amah­erawhchu tempo leh key vel avanga record ṭha leh chauh ka ni,” a ti.

Tuna a hla thar hi Manuna tan kum hnih chhunga a music video thar ber a ni. “Nikum chhung khan video pakhat mah ka siam lo a, tun hi ka siam leh hmasak ber a ni,” a ti. ‘Duhaisam’ hla hi MDM Library-ah dahin Zonet lamah pawh en theih turin a dah bawk.