Mamit KṬP-in Kristian film an siam

Kristian Ṭhalai Pawl, Mamit Branch chuan Kristian movie, hmuhnawm tur tak mai an siam a, an film siam hi ‘Carcinos’ a ni.

‘Carcinos’ film hi thil thleng tak tak behchhana siam a ni. Tlangval fel leh hmelṭha tak maiin cancer natna hneh ngei tuma a beihna film, a natna hneh tuma a beihna kawnga thil thleng mak leh dangdai tak tak kara hmangaihna thawnthu lungchhiatthlak tak mai chung­chang a ni.

Shooting pawh an uluk a, Mamit leh Aizawl bakah Shillong leh Guwahati-ah te an chang. Shooting hi zawh fel thawkhat a ni tawh a, October thlaa release hman tuma inbuatsaih mek a ni. A changtute hi Vanlalremruata leh Lalmuanpuii te an ni a, Mizo movie lamah hnuhma la nei lo mah se, an chang thiam hle.