BBMA-a BTS langin K-Pop a tilar

Billboard Music Awards sem turah K-Pop band lar BTS chu nominate an ni a, hei hian US-ah chuan K-Pop nasa takin a tilar lehzual hle. K-Pop hi US mainstream music-a an hmelhriat tak takna la rei lo mah se, huhang erawh a nei lian tawh hle.

BTS hi BBMA-a K-Pop zinga nominate hmasa ber an ni a, Top Social Artist category-ah an lang. He category-a an lang hi thilmak a ni lo a, Billboard hnuaia Social 50 Chart-a lang rei thei ber pathumna an ni tlat. Anni aia he chart-a lang rei theite chu Taylor Swift leh Justin Bieber te chauh an ni.

Kum 2006 aṭang khan US mainstream music-ah K-Pop hian hriat a hlawh tak tak ṭan chauh a ni. MTV chu K-Pop huhang neih len sawtzia hmu hmasatu an ni a, satellite TV-ah MTV K an tichhuak nghe nghe. Hemi kum hian actor leh zaithiam Rain chu Time 100-ah a lang pha bawk.

Kum 2008 aṭang khan US cable TV-ah K-pop zaithiam zai hmuh ṭan a ni a, kum 2009 khan Wonder Girls chu US-ah an tla na viau tawh bawk. Wonder Girls hi The Wendy Williams Show leh So You Think You Can Dance-ah te an lang. Hemi hnu hian Girls’ Generation an rawn lang a 2NE1 te pawh US-ah hian an tla nain, an album eng emaw zat an hralh. Chutah ropui takin Psy chu a Gangnam Style nen a rawn inphochhuak leh bawk. K-Pop music pualin Billboard chuan a hranpain chart a siam chho a, tunah chuan an award ngaihhlut berte zinga mi, Billboard Music Awards (BBMA)-a nominee-ah hial an tel ta.