DARBU app-in Rs. Nuai 2 vel zaithiamte hnenah pe chhuak tawh!

Mizo zai ngaihthlak theihna application DARBU chu zaithiamte'n an hlawkpui ṭan mek a, zai mite tan kawng duhawm a hawng mek zel.

May thla tawp lama tlangzarh a ni chauh bawk a, hla leh album dahtu pawh an la tam lo. Chuti chung chuan Darbu application buaipuitute hian zaithiamte hnenah Rs Nuai hnih dawn an pe chhuak tawh tih Vanglaini an hrilh.

Darbu lamah chuan tute nge che ṭha ni ta?
Darbu application hmangtute chuan Darbu Exclusive album awmzia an hria ang. Chutah chuan man chawiin zaithaimte album a ngaihthlak theih. (A free-a ngaihthlak theih hla tam tak a awm tih hre tel ila).

June thla tawpah khan Youth Icon hmasa ber Zoramchhani chuan album thar 'Fak Zai Ri' Darbu kaltlang hian a tichhuak a, chu album chu he thu buatsaih lai thleng hian mi 300 chuangin an lei tawh. Mizoram chhung bakah India ram hmun hrang hrang aṭangin leh US aṭangte pawha leitu an awm.

Lengzem singer lar ber zinga mi JT Porduction pawhin Darbu-ah hian a album thar 'Rimawi Dul' kha dah ve bawkin ani pawh hian he application kaltlang hian album copy eng emaw zat a hralh tawh bawk.

Single lamah 'SDO Dance' a hit
July 6 khan K Hminga chuan Darbu-ah hian tunhnaia a hla tihchhuah thar, hit em em mai 'SDO Dance' a tichhuak a nih kha. Ani hian he application kaltlang hian Rs 80,000 chuang sum a lalut der tawh. Mizoram mai bakah Zoram pawn lam aṭanga leitu an ṭhahnem.

Darbu buatsaihtute chuan an application huang chu zauh zel an tum thu Vanglaini an hrilh a, hmabak tam tak an neihte chak lehzuala kalpui an tum. An tum bulpui ber, Mizo Zaimite tan eizawnna tling ngei a nih theih nan theihtawp an chhuah zel thu an sawi a ni.

Darbu exclusive release a zaithiamte hla/album dah chu lei tur a ni a, hmun danga lakchhuah emaw, copy chhawn emaw theih a ni lo. Heta ṭanga an sum hmuh 90% chu artist-te hnenah lutin a dang 10% chu Darbu-in a chang thung a ni.