Hip Hop fans chhanchhuaktu tur Kawtthler Pasalṭha KIMOCHI x Ty_, Blu Scar, JAY'$

KIMOCHI, Ty_, Blu Scar leh JAY'$-te thawkho chuan Zirtawpni liam ta khan hla thar 'Kawtthler Pasalṭha' an tichhuak a, YouTube lamah a hmeh chhuah theih reng tawh. Artist la tharlam tak ni si; ni khat chhung lekin views, likes, leh comments pawh a ṭhahnem hman hle.

Heng artist tharlam tak tak, underground rapper-te hla thar mawi tak hi YK Official channel-ah an dah a, anmahni i la hre ngai lo a nih pawhin an hla hi han ngaithla la, hip hop/rap lam tuipuitu i nih chuan i beng a tlai ngei ang.

He hla beat produce tu; DJ ni bawk hi Kimochi niin, a hma lamah pawh tuna rapper te leh midang rapper te pawh a lo produce sak nual tawh a. Vocal recording leh mixing erawh Yugibeats kutchhuak a ni thung.

He music video puitlin theih nana sponsor tu hi YK Solar/YK Official a ni a, a music video nalh tak maia shoot-a edit-tu hi Jon Mizo Visuals a ni bawk.

Music video hmuh nuam tak nen an hla thar hi an tichhuak a, an hla kalhmang pawh ṭhalaite rilrem zawng tak tur, inṭhianṭhatna lam hla a ni a, beng tithlep tur chi, ruihhlo leh ṭawngkam mawi lo zawng thu zeh tel a awm lo ringawt pawh hi ngaihthlak tinuamtu a ni.

June thla tir khan yk Official leh KIMOCHI ṭangkawp hian Hip Hop Fest hlawhtling takin an lo buatsaih tawh a, Rapper/Artist leh hip hop ngainatu ṭhahnem tak nen hun an hmang a, YK official channel-ah an performance te pawh en let theihin an dah nghe nghe. Tunah hian Season 2 neih leh turah hma lak mek niin, music video hmuhnawm tak tak pawh an buatsaih chho zel dawn a, Mizoram hip hop huang tan a lawmawm hle a, hmasawnna tam tak a awm belh zel turah i beisei ang.