Mission Veng Vikings champion zanah Dem Boys an thiam ber

Mizoram Super League Season 3 chu Zirtawpni zan khan final a ni a, Mission Veng Vikings an champion a, Dance Battle-ah thung chuan Dem Boys an thiam ber.

MSL Halftime Dance Battle-ah hian Dem Boys chu tuma tluk rual an ni lo a, GOV leh Emerge ten an tluk lo. GOV crew hi pahnihna an ni a, Emerge crew chu pathumna an ni. Pakhatna Dem Boys hian Rs. 20,000 leh trophy an dawng a, pahnihna GOV hian Rs. 10,000 leh trophy leh, pathumna Emerge-in Rs. 7,000 te an dawng.

MSL Halftime Dance Battle hi Baksetball Semi Final match aṭang khan neih ṭan a ni. Dance Battle-a tel tur hian video audition kaltlangin crew pali thlan chhuah an ni a, final lut tur hian crew pahnih thlan tur ni mah se an point inan vang leh an thiam rual em avangin crew pathum - Dem Boys, GOV leh Emerge te hi final luhtir an ni. Climax Fabulous Crew te chu palina an ni thung.

MSL Halftime Dance Battle Final-ah hian zan khatnaah Mizo Rap Challenge hmangin an intihsiak. He challenge-ah hian Mizo rap music te hmangin anmahni lam dan style ṭheuhin an rawn lam. Zan hnihnaah hian Bhangra Challenge an nei thung. He challenge hi Punjabi dance, tunlai khawvela lar chho mek, dance crew te pawhin an la tihchhin ngai loh a ni. Mahse he challenge-ah hian bhangra step rawn hmang telin anmahni style telh tho siin an rawn lam a, an thiam hle.

MSL Dance Battle Judging criteria-ah hian point 5 en bik a ni a: Cho­reography (an lam step, style leh challenge an rawn hman thiam dan); Synchronization (an lam rual leh teamwork); Difficulty (an step har zawng leh tricks an telh te); Execution (an rawn lam chhuah dan leh an ti dik em tih te); Showmanship (an expression, mipui an hip dan leh boruak an rawn siam dan). Dance crew finalists pathumte hian ṭhatna lai leh ṭhat lohna lai an nei vek. Zan khatnaah hian GOV chuan point tlem tein hma an hruai a, Dem Boys-in dawtin Emerge an hniam ber. Zan hnihnaah ve thung chuan Emerge an rawn che ṭha thung a, Dem Boys-in rawn dawt leh thoin, GOV chu a hniam ber an ni. Point belh khawmah hian crew consistent ber, ngai awh rei thei ber Dem Boys chu an sang ta ber a ni.

Dem Boys crew-a an member te hi Isak Chhakchhuak, Steve Zamzam, Stephan Ralte, Zuala Renthlei leh Nicholas Rinawma te an ni. An member te hi event hrang hrangah lam ho ṭhin mah se an crew tak hi chu MSL tan bika din a ni. GOV member te hi Varun, Rohlua, Henry, Omega leh Zodina te an ni thung. Season 1 ah BGMX ang­in MSL ah an lo tel tawh a, season 2 ah video audition-ah tling zo lovin, kumin hian pahnihnaah an rawn inhlangkai ta a ni. Emerge Crew member te hi Mapuia, Duhsanga, Dave, Fela leh Mawia te an ni a, Mizo dance crew ah chuan a senior ber pawl an ni. Season 1 aṭang la tel ziahin final lut pha lo chiahah an awm ṭhin a, kumin hi final an luh vawi khatna a ni.

MSL final zan hnihnaa Opening performance - Crew finalists te leh leh nikum Season 2 champion Riborn te lam chuan fak a hlawh hle. Bollywood behchhanin an lam a, an lamah hian tunlai track leh Baahubali, Bloody Hell -Rangoon leh Tamma Tamma Again te hman a ni.

MSL Best Cheerleader ah BCA
MSL Best Cheerleader thlan a ni a, Zarkawt BCA Cheerleaders te chu ṭha bera thlan an ni. Best Cheerleader ni tur hian lam thiam piah lamah MSL 3 ṭan anih phat aṭanga an attendance, an inpekna, an punctuality leh an club tana an cheer dan hrim hrim aṭanga thlan an ni.

BCA Cheerleaders ah hian member paruk an awm a, Zarkawt BCA an khelh tawh hi chuan hmaih theih miah lovin an cheerleaders te hi an ṭangin an lo au nasa thei hle. Club tana pawimawh tak pakhat an tling a ni. Zarkawt BCA Cheerleaders member te hi Ruthxy, Catherine, Regina, Linda, Jessica leh Ruthi te an ni. Best Cheerleaders hian Rs. 5000 leh trophy a keng tel.