Jay-Z leh Beyonce Billion dollar couple-ah puang

Forbes chuan Jay-Z leh Beyonce te nupa chu nupa USD tluklehding­awn neiah a puang.

Phir nei mai tur Jay-Z leh Beyonce te nupa hian an fanu Blue Ivy leh lo la piang tur phirte tana thil lei leh enkawlna vel chu an buai dawn lo chiang. Forbes chuan nupaa USD tluklehdingawn neiah a puang a, zaithiam nupa tuak hausa leh hlawhtling an ni.

Jay-Z hi hip-hop artist zinga hausa ber dawttu a ni a, USD mtd 810 zet a nei a nih kha. Hip-hop artist hausa ber Diddy aiin USD mtd 10 vel chauhin a nei tlem zawk. Kum 35 mi a nupui, Beyonce pawh hi rethei bakberh a ni lo chiang. Bey hausakna hi USD mtd 350 vel zet a ni a, an nupaa an hausakna belh­khawm hi USD tlukleh­dingawn 1.16 zet a tling.

Hetiang hian hausa mah se, mihring duhâmna hian chin tawk a nei lo a ni ber. Han ngaih­tuah mai chuan hman sên loh pawisa an nei tawh chung­in an la duh tawk lo. Forbes-in hman deuha Beyonce zawhnaah a zawh, duh tâwk an ngah dawn tawh em tih chu Bey hian, “Duh tawk a awm thei ngai lo ang,” tiin a chhang. “Ka industry-ah hian kei aia thawk rim hi ka la hmu lo,” tiin, nei belh zel turin Beyonce pawh hi a la ṭang sauh sauh a ni.

He mite nupa hian zai lam ngawr ngawr aṭangin sum an lalut lo a, Roc Nation te, Armand de Brignac leh sumdawnna kawng hrang hrang aṭangin sum an lalut nasa hle a, Jay-Z phei chuan sumdawnna kawng hrang hrangah hâk a zauh nasa lehzual hle a ni.