Jennifer Lopez leh Ben Affleck-te'n 'Tiam tlat e' an ti ta

Hollywood star pahnih Jennifer Lopez leh Ben Affleck-te chu Pathianni khan Las Vegas-ah an innei.

An inneih thu hi Jennifer Lopez hian a website-ah tarlangin, "Kan tihlawhtling ta e. Hmangaihna hi a mawi. Hmangaihnain ngil a nei. A lo dawhthei tih pawh a chiang e. Kum 20 lai a dawhthei a ni," tiin a ziak.

Kum 20 liam taah khan J.Lo leh Affeck-te hi an lo intawng tawh a, lo inhual hial tawhin kum 18 liam taah khan an inhualna chu an titawp tawh bawk. Chutichuan, kawng hran an zawh ta a, hun rei tak chhung chu midangte an han kawp ang lawp lawp a. Mahse nikumah khan an inzui leh thu social media lamah an tarlang! An fan-te ngaihdan pawh a inang lo hle a nih kha.

"Kan duh ang chiah a ni. Nizanah khan Vegas panin kan thlawk chhuak a, nupa tuak thar tur dang pali nen license dilin kan intlar, kan vai chuan khawvela inneihna khawpui lam panin kan kal," tiin Pi Affleck-i chuan phur takin an inneih chungchang a tarlang. Film hlui pakhata thawmhnaw a hak thu sawiin Affleck erawh chuan chumi hun atan bika a dahṭhat a jacket a ha tih a sawi.

Kum 52 mi Lopez leh kum 49 mi Affleck-te hian April thla khan an inhual thu an sawi tawh a, Clark County Clerk Office, Nevada-a miin an record system-a a tarlan dan chuan Jennifer Lopez hian a hming pawh Jennifer Affleck tiin a thlak dawn.

Affleck leh Lopez hi kum 2002 khan movie Gigli set-ah an intawng a, kum 2003 khan inhualin a kum lehah an inhualna chu an titawp. Affleck hi Lopez-i pasal palina a ni tawh a, Lopez hi Affleck-a nupui pahnihna a ni tawh thung.

Ben Affleck hian fa pathum nei tawhin J.Lo hian fa pahnih a nei ve tawh bawk a ni.