Adama leh Sangtei an 'Lungrun' dawn

Adama leh Sangtei kan hria. An zai dunna eng emaw zat YouTube lamah thlira ngaihthlak tur a awm tawh a, ṭhenkhat phei chuan thlirtu maktaduai 10-te an nei hial! Mizoram mai bakah ram pawn aṭang pawhin lawmtu an tam. Mahse, official music video an la siam lo!

Tunah erawh mi hla 'cover' mai loin, anmahni pualin music video an rawn tichhuak dawn. Lo inring rawh le.

Adama leh Sangtei-te music video hi 'Lungrun' tih a ni a, Zofate zinga rimawi tum leh hla phuah thiam kan neih ṭhat ber zinga mi; kum 1977 vela Gospel Band lar tak INVADERS member ni ṭhin, fam ta Valzotea- R. Zoliana phuah a ni.

'Runmawi', 'Di enchim loh', 'Ka D ka parmawite' tih vel lo phuah tawhtu hla phuah ngei mai Adama leh Sangtei-te'n an rawn sa tur hi a nghahhlelhawm tawh viau mai. Anni pahnih hi an producer Bz Sailo hmalakna hnuaiah hla eng emaw tichhuak tawh an ni a, state pawn thleng pawha sum tam tham tak hlawha zai tura an sawm fo tawh, Nagaland Hornbill Festival leh Manipur World Music Day-ahte pawh zai tura an lo sawm zak zak tawh an ni.

'Lungrun' hi Blue Wave Records, Chanmari West-ah an record a, Moonshine chuan video an siam sak thung. YouTube lamah an chhawp chhuak thuai dawn a, chumi hma chuan Zonet Cable TV lamah an tichhuak hmasa thung ang.