Alien: Covenant beisei pha loin pakhatna
‘Prometheus’ film i en kha chuan a chhunzawmna ‘Alien: Covenant’ hi i nghakhlel hle ang tih kan hria a, mahse i beisei erawh a pha lo deuh mai thei. He film hi North America-ah pakhatna luah mah se, a sum lakluh erawhin beisei a pha thlawt lo.
Alien: Covenant hi kar tawp khan hmun 3,761-ah chhuah a ni a, Guardians of the Galaxy Vol 2 pawh pawtthla ngei mai mah se, kar tawp chhunga a sum lakluh zawng zawng hi USD mtd 36 chauh a ni. Prometheus kha a tluk pha lo tura ngaih a ni a, Prometheus khan khawvel pumah USD mtd 403.4 zet a lalut a, hetiang zat zat hi chu a tlin ve a rinawm loh.
BBC4-in a tarlan dan chuan Alien: Covenant hi Star Wars film ang maia lian ni mah se, box office-ah a che chhe hle. A chhan ber nia lang chu Star Wars hi chu chhungkuain, naupangte nena en chi a nih laiin, Alien Covenant erawh hi chu tharum thawhna leh thil rapthlak lam, naupang en ve loh chi a tam; chu bakah chuan tunlaiin film thar ṭha tak tak a chhuak mawlh mawlh a, chu chu chuan a market a tichhia a ni a ti.
Guardians of the Galaxy Vol. 2 chu pahnihnaah awmin, USD mtd 35.1 zet a thawk chhuak leh a, novel behchhana siam Everything, Everything chu pathumnaah a awm a, USD mtd 12 a lalut.
Box office movie
“Alien: Covenant” - $mtd 36
“Guardians of the Galaxy Vol. 2” - $mtd 35.1
“Everything, Everything” - $mtd 12
“Snatched” - $mtd 7.6
“Diary of a Wimpy Kid: The Long Haul” - $mtd 7.2
“King Arthur: Legend of the Sword” - $mtd 6.8
“The Fate of the Furious” - $mtd 3.2
“The Boss Baby” - $mtd 2.8
“Beauty and the Beast (2017)” - $mtd 2.4
“How to Be a Latin Lover” - $mtd 2.2