Dune: Part Two an chang ṭan ta

Film thawm nei ring tak 'Dune: Part Two' chu an chang ṭan ta tih an Twitter account lamah tarlan a ni.

Sci-fi film boruak nei lian tak Dune tlangzarh a nih aṭanga kum khat dawn a liam hnuah 'Dune: Part Two' chu chan ṭan a ni leh ta a, nakkum November 17-ah tlangzarh a ni ang.

Denis Villeneuve chuan a direct leh dawn a, Budapest, Abu Dhabi, Jordan leh Italy-ahte an chang kual dawn a ni.

Warner Bros. Pictures leh Legendary Entertainment-te pawhin he film-a changtu tur list chu official-a tichhuak ve nghalin a film kalphung tlangpui tur pawh an tichhuak tel bawk.

"A chhunzawmnaah hian Paul Atreides-a zinkawng ropui tak, Chani leh Fremen-te nena an intawn lehna a chhungkaw tichhetute laka phuba la tura indona kawng a zawh dan tihlan a ni ang," tiin an ziak.

'Dune: Part Two'-ah hian Timothee Chalamet, Zendaya Coleman, Rebecca Ferguson (II), Josh Brolin, Dave Bautista, Charlotte Rampling, Stellan Skarsgard, Javier Bardem leh Stephen McKinley Henderson-te chu an chang leh dawn a, Austin Butler, Christopher Walken, Florence Pugh leh Lea Seydoux-te'n an belh dawn bawk.

Dune film hmasa kha July, 2019-ah chang zo daih tawhin hripui leng vang khan vawi eng emaw zat tlangzarh hun an sawn hla a, October 2021 khan hrileng karah tlangzarh hramin, cinema en tura punkhawm miin an la hlauh em em lai mah nise $maktaduai 401 a hmu chhuak tho a ni.

Dune hi kum 1965-a tihchhuah Frank Herbert-a lehkhabu ziah behchhana siam a ni a, kum 1984-ah khan David Lynch chuan film-a lo tichhuak tawhin Denis Villeneuve hian a rawn thar thawh leh a ni.