Ariana Grande Concert-ah bomb a puak
Ariana Grande hian Manchester khawpuiah Thawhṭanni khan concert a nei a, a concert neihna hmunah hian, UK sanaa zan dar 10:30-ah bomb (nail bomb) hi a puak a ni. Greater Manchester Police-tena an sawi dan chuan mi 22 an thi a, mi 50 ten hliam an tuar. North West Ambulance Service NHS Trust chuan mi 59 ten hliam an tuar niin a sawi thung.
Greater Manchester Police chief constable Ian Hopkins chuan hliam tuarte hi Manchester khawpui chhunga damdawi in hrang hrang parukah enkawl an nih thu a sawi. Pawikhawihna chungchang hi sawiin, “Tunah tak chuan he thil thleng hi firfiakte chêtna nia ngaih a ni a, thuchiang zawk a awm hma chuan firfiakte thiltih niin kan ngai rih ang,” a ti. US official-te pawhin firfiakte thil tih niin an ngai a, thihchilh bomb niin an ringhlel nghe nghe.
Ariana Grande
Ariana hian ‘Dangerous Woman Tour’ a nei mek a, he tour hian UK leh England a fang mek a ni. A concert-a bomb puak hian amah a nghawng hle, chanchinbute chuan a rilru a mangang a, a buai hle niin an sawi. Amah tak hi chuan hliam leh taksa lama harsatna a tawk lem lo a, rilru lamah erawh a buai phah hle. Pawikhawhna thlen hnuah Ariana chuan Twitter aṭangin “Broken. From the bottom of my heart, I am so so sorry. I don’t have words” tiin a ziak. Concert entu hi mi 21,000 vel nia ngaih a ni a, eng pawl mahin an tih a nih thu an la sawi lo.
ISIS?
Daily Mail-in a tarlan dan chuan nimin tlai khan Twitter account pakhatah pehhel deuh sia bomb puak tur ni âwma ngaih theihin thu post a awm. He post-ah hian ISIS flag a background-ah a awm a, #IslamicState leh #Manchesterarena tih post tel a ni bawk. “You forget our threat? This is the just terror” tih post tel a ni bawk a, mahse a hnu lawkah delete leh a ni. Concert entu zinga pakhat chuan, “Silai puak ri ang maia puak ring tak maiin ṭum nga emaw ṭum ruk puak thâwm ka hria. Pawna kan chhuah chuan midangte pawh chu an lo chhuak tawh hlawm a, a ṭhen an ṭap a, phone an la hmang mek hlawm,” a ti.
Zaithiam dangte
Ariana Grande concert-ah bomb a puak tih hriat a nih ve leh zaithiam dang hoten pawi an tih thu an tarchhuak nghal thuai hlawm. Katy Perry chuan Ariana Grande show-a kal zawng zawngte ṭawngṭaipui turin a fan-te a sawm a, Demi Lovato chuan concert entu pawisawi lo tam tak thihna chu pawi a tih thu tarlangin mitinte leh Ariana Grande tana ṭawngṭai turin a ti bawk. Ellie Goulding, Bruno Mars, Taylor Swift, Selena Gomez, Olly Murs, Miley Cyrus, Harry Styles leh zaithiam lar tak takte an ṭawng chhuak a, ṭawngṭaipui turin an ti hlawm.
Sorkar lam
Britain sorkar a thinrim hle a, an prime minister Theresa May hoin ṭhi beh chinho an ṭhu khawm nghal. Theresa May chuan UK-in thla leh maia General Election an neih tur atana a campaign chu he chhiatna avangin a titawp lailawk rih dawn tih a puang. Liberal Democrat hruaitu Tim Farron chuan, “Hlim taka concert entu naupang leh ṭhalaite râwng taka beih an ni hi a rapthlak a, nasa takin min ṭhâwng a ni,” a ti.