Harry Styles nge nge!

Album a tihchhuah hma hauh aṭangin a album tur hian chanchinbu lian tam tak headline a luah tawh a, album a tichhuak a, Harry Styles chu Harry Styles a lo ni, Billboard 200 chart-ah pakhatna a luah chiang hle.

One Direction member, Harry Styles chuan a solo album hmasa ber ‘Harry Styles’ chu a tichhuak ta a, kar liam ta chhung khan copy 230,000 zet hralhin, Billboard 200 chart-ah pakhatna a luah chiang hle. Harry Styles album hralh aṭanga copy 193,000 zet hi album pangngai, CD ang chi kha a ni a, a bak chu album tlukpui a ni.

Harry Styles hian Billboard 200-ah record a rawn siam nghal a, Sam Smith a rawn lehpel. UK mipa zaithiam zinga chawlhkar khat chhunga US-a album hralh hnem ber ṭhin chu Sam Smith a ni a, kum 2014-a a album ‘In the lonely hour’ hmangin he record hi a siam. Mahse Harry Styles a rawn lan meuh chuan tuma tluk rual a ni lo a, Sam Smith chungah a rawn awm nghal a ni. UK mipa zaithiam zinga US-a chart-a pakhatna luah thei pahnihna a ni a, ani hmaa mi hi a band mate ṭhin Zayn Malik kha a ni.

Zac Brown Band album thar ‘Welcome Home’ chu pahnihnaah a awm a, kar liam ta chhung khan copy 146,000 an hralh. Zac Brown Band hi an hlawhtling hle a, tuna mi an album top 10-a lang thei pangana a ni. Kendrick Lamar-a album hlawhtling ‘DAMN’ chu pathumnaah a la awm thei a, copy 117,000 zet mai a la hralh thei.

Billboard 200 chart

“Harry Styles” - Harry Styles (230,000)

“Welcome Home” - Zac Brown Band (146,000)

“DAMN” - Kendrick Lamar (117,000)

“From A Room: Volume 1” - Chris Stapleton (75,000)

“Guardians of the Galaxy Vol. 2” Soundtrack - Various Artists (69,000)

“After Laughter” - Paramore (67,000)

“More Life” - Drake (58,000)

“Bloom” - Machine Gun Kelly (57,000)

“Divide (division sign)” - Ed Sheeran (47,000)

“24K Magic - Bruno Mars (41,000)