James Bond-a chang hnem ber Sir Roger Moore Cancer natna avangin a thi

Khawvel mi tam takin James Bond ti-james bond-tu bera an ngaih, James Bond film-a 007 agent lema chang hnem ber, Sir Roger Moore chu Thawhlehni khan cancer natna avangin kum 89 mi niin a thi. Sean Connery nen vawi sarih ve ve an chang.

Entertainment khawvela actor ropui leh hriat hlawh, British chawimawina sang dawnga a hming bula ‘Sir’ dah pha Roger Moore chu cancer natna a neih hnu reiloteah a natna tuar loin a thi. Roger Moore thih thu hi a faten puang chhuakin, “Thinlung ngui leh rit tak chungin kan pa, Sir Roger Moore chuan cancer natna a neih hnu reiloteah, Switzerland-ah chatuan ram min pansan ta tih kan puan a ṭul ta. Huaisen takin a natna hi a hmachhawnin a tuar a ni,” an ti. A fate hian an pain a duh dan angin a vuina hi Monaco-ah private taka hman a ni ang an ti bawk. A fate hian an pain a dam chhunga a hlawhtlinna ropui bera a ngaih chu UNICEF tana theihtawpa hna a thawh chu niin an sawi bawk.

Roger Moore hian a fate pathum bakah a nupui hnuhnung ber, Kristina ‘Kiki’ Tholstrup te a kalsan.

Roger Moore hi kum 1927 October 14 khan a piang a, a hming pum hi Roger George Moore a ni. James Bond film-ah hian Sean Connery a chan loh hnuah a thlak a, kum 1973-a Live and Let Die kha James Bond lema a channa hmasa ber a ni. James Bond film chang tawh zinga Sean Connery nen chang hnem ber an ni a, James Bond film pasarihah ve ve an chang. James Bond film-a a chan hnuhnun ber chu A View To A Kill kha a ni a, kum 1985-a a chan kha a ni.

Movie lamah a lut hma hle a, a channa hmasa ber chu kum 1937-a mi, Double Wedding kha a ni. Hemi hnu hian film langsar tak takah a chang a, chung zingah chuan Ivanhoe (TV series), The Saint (TV series), Romulus and the Sabines, The Wild Geese, The Quest te hi a langsar zual a ni awm e. Movie pangngaia a channa hnuhnung ber chu A Princess Christmas kha a ni a, kum 2011-a mi a ni.

Vantlang tana thil ṭha tih leh mi ṭanpuina lam hi a ngai pawimawh hle. Hei vang hian kum 1999 khan Order of the British Empire chawimawina pek a ni a, kum 2003 June thla khan heta ṭang hian promote a ni a, Knight Commander nihna pek a ni a, a hming bulah ‘Sir’ tih a dah thei ta a ni. Kum 2007 khan Hollywood Walk of Fame-ah lakluh a ni a, kum 2008 khan French sorkar chuan Commander of the Ordre des Arts et des Lettres nihna a pe. Kum 1991 aṭang khan UNICEF chuan Goodwill Ambassador-ah an hmang bawk.

Roger Moore
Pian hun October 14, 1927, Stockwell, London-ah
Thih hun May 23, 2017 Switzerland-ah
James Live and Let Die (1973)
Bond-a The Man with the Golden
a channa Gun (1974)
The Spy Who Loved Me (1977)
Moonraker (1979)
For Your Eyes Only (1981)
Octopussy (1983)
A View to a Kill (1985)